Bakı, AzerVoice
İsveçrə Federal Şurası Suriyaya qarşı bəzi sanksiyaları ləğv edib.
AzerVoice xəbər verir ki, bu barədə Federal Şuranın rəsmi saytında verilən açıqlamada deyilir.
Açıqlamada qeyd olunur ki, Federal Şura Suriya energetika və nəqliyyat sektorlarına qarşı tətbiq olunan sanksiyaları ləğv edib.
Bununla yanaşı, bir sıra maliyyə xidmətlərinin göstərilməsinə və bəzi bank əməliyyatlarının aparılmasına icazə veriləcək.
Açıqlamada bildirilib ki, məhdudiyyətlərin yumşaldılması, prezident Bəşər Əsədin hakimiyyətdən uzaqlaşdırılması fonunda həyata keçirilir və bu addım sülh və nizamlı siyasi keçid prosesini dəstəkləmək məqsədi daşıyır.
Bununla belə, Suriyanın dondurulmuş aktivləri və digər iqtisadi resurslarının açılmayacağı vurğulanıb.
Xatırladaq ki, keçən ay Avropa İttifaqı (Aİ) Suriya üçün energetika və nəqliyyat sahələrində tətbiq olunan sanksiyaları dayandırıb. Brüssel dörd Suriya bankını qara siyahıdan çıxarıb, Syrian Airlines aviaşirkətinə qarşı məhdudiyyətləri ləğv edib və ölkənin Mərkəzi Bankına vəsaitlərin ayrılmasına icazə verib.
