BAKI, AzerVoice
Suriyada keçid hökumətinin süqutu, ölkə ərazisində “İslam Dövləti” (İŞİD) adlı terrorçu qruplaşmanın yenidən dirçəlməsinə yol aça bilər.
AzerVoice xəbər verir ki, bu barədə ABŞ dövlət katibi Marko Rubio bildirib.
Onun sözlərinə görə, hazırda Suriyanın yeni hökuməti dağılmaq təhlükəsi ilə üz-üzədir və bu, ölkədə yenidən vətəndaş müharibəsinin başlaması ilə nəticələnə bilər.
“Vətəndaş müharibəsi ölkənin İŞİD və digər cihadçılar üçün bir növ oyun meydanına çevrilməsi anlamına gələrdi. İranın bölgədəki təsirinin qayıdacağı təhlükəsi isə əlavə riskdir" - deyə, Rubio qeyd edib.
ABŞ administrasiyasının Suriya keçid hökuməti ilə əməkdaşlığına toxunan dövlət katibi qeyd edib ki, bu əməkdaşlıq indiki hökumət üçün uğur təmin etmir.
“Bu, uğurla nəticələnə bilər, amma nəticəsiz də qala bilər. Lakin əgər cəhd etməsək və əməkdaşlıq aparmasaq, onda uğursuzluq qaçılmaz olacaq”, - Rubio bildirib.
Qeyd edək ki, mayın 14-də ABŞ prezidenti Donald Tramp Səudiyyə Ərəbistanının paytaxtı Ər-Riyadda Suriyanın prezidenti Əhməd əş-Şəraa ilə görüşüb. Görüş zamanı Tramp bildirib ki, ABŞ uzun illər Hafiz Əsəd və oğlu Bəşşar Əsədin hakimiyyəti dövründə tətbiq olunan sanksiyaların ləğvinə başlayacaq.
