BAKI, AzerVoice

Tramp bir neçə günə atəşkəs elan edə bilər.

AzerVoice xəbər verir ki, İsrailin Qəzza zolağında mülki fələstinlilərin sığındığı məktəbə hava zərbəsi endirməsi nəticəsində onlarla insanın həyatını itirdiyi bildirilərkən, eyni zamanda ABŞ prezidenti Donald Trampın yaxın günlərdə atəşkəs elan edəcəyi də qeyd edilib.

Əl-Əqsa televiziya kanalı və yerli Fələstin mənbələrinin məlumatına görə, Qəzza şəhərinin əl-Durc məhəlləsində yerləşən Fəhmi əl-Cərcəvi məktəbinə təşkil olunan hava hücumu nəticəsində ətrafda yerləşən çadırlarda yanğın baş verib. Hadisə zamanı azı 25 nəfər həlak olub, çoxlu sayda insan isə yaralanıb. Görüntülərdə uşaqların həyatını itirdiyi, digərlərinin isə yanğınlardan qaçmağa çalışdığı əks olunub.

ABŞ prezidenti Donald Tramp jurnalistlərə verdiyi açıqlamada, Birləşmiş Ştatların həm İsrail, həm də HƏMAS rəsmiləri ilə təmasda olduğunu və “bu vəziyyəti mümkün qədər tez dayandırmaq istədiklərini” söyləyib. Sky News Arabia kanalına danışan mənbələrin iddiasına görə, Tramp yaxın günlərdə atəşkəsə dair bəyannamə elan edə bilər. Bildirilir ki, bu razılaşma İsrail girovlarının azad olunması məsələsini də əhatə edəcək.

Qeyd edək ki, İsrail ordusunun Qəzzaya qarşı son hərbi əməliyyatları 7 oktyabr 2023-cü ildən başlayaraq indiyədək 53 min 939 fələstinlinin həyatına son qoyub, 122 min 797 nəfər isə yaralanıb. Son hücum dalğası nəticəsində isə yalnız martın 18-dən bəri 3785 nəfər ölüb, 10 min 756 nəfər yaralanıb.

İsrail hökuməti isə Qəzza zolağının tam işğalını planlaşdırdıqlarını, fələstinliləri cənubdakı “toplama düşərgələrinə” köçürməyi və bölgənin gələcəkdə daimi olaraq nəzarət altına alınacağını bəyan edib.