BAKI, AzerVoice
İyunun sonunda Haaqada keçiriləcək NATO sammitində ABŞ prezidenti Donald Trampın iştirak etməməsi alyans üçün ciddi böhran əlaməti olacaq.
AzerVoice xəbər verir ki, bu barədə Polşa prezidenti Andjey Duda bildirib.
“Əgər Donald Tramp Haaqadakı NATO sammitinə gəlməsə, bu, böhran əlaməti kimi qəbul ediləcək. Düşünmürəm ki, o gəlməyəcək” – deyə, Duda vurğulayıb.
Xatırladaq ki, may ayının əvvəlində Almaniyanın “Der Spiegel” jurnalı Trampın NATO ölkələrinin hərbi xərclərini ÜDM-in 5 faizinə qədər artırmaması halında sammitdə iştirak etməyə biləcəyi barədə ehtimalını irəli sürmüşdü. Lakin mayın 23-də ABŞ-ın NATO-dakı daimi nümayəndəsi Metyu Uiteker Trampın sammitə qatılmasının planlaşdırıldığını bildirmişdi.
Həmçinin qeyd edək ki, NATO sammiti 24-25 iyun tarixləri arasında Haaqa Konqres Mərkəzində keçiriləcək. Tədbirdə təxminən 45 dövlət və hökumət başçısının, 45 xarici işlər və müdafiə nazirinin, həmçinin 6 minə yaxın nümayəndə heyəti üzvünün iştirak edəcəyi gözlənilir.
