BAKI, AzerVoice
ABŞ-ın müdafiə naziri Pete Hegseth 2026-cı il üçün Ukraynaya ayrılan hərbi yardımın azaldılacağını açıqlayıb.
AzerVoice xəbər verir ki, nazir bu barədə ABŞ Konqresində 2026-cı il büdcəsinə dair keçirilən iclasda çıxış edib.
Pete Hegseth çıxışında ABŞ administrasiyasının Rusiya-Ukrayna müharibəsinə əvvəlki illərlə müqayisədə fərqli yanaşma sərgilədiyini bildirib. O, Tramp administrasiyasının müharibəyə “çox fərqli prizmadan” baxdığını vurğulayıb.
Nazirin sözlərinə görə, Ukraynanın 1 iyunda Rusiya hərbi hava limanlarına pilotsuz təyyarələrlə endirdiyi hücumlar, yeni müharibə texnologiyalarının təsirini ortaya qoyub. Hegseth bu təcrübədən “lazımi dərslərin” alındığını və ABŞ-ın hava hücumundan müdafiə sistemlərini buna uyğun yenidən nəzərdən keçirdiyini qeyd edib.
Xatırladaq ki, ABŞ prezidenti Donald Tramp martın 4-də Ukrayna prezidenti Vladimir Zelenski ilə Ağ Evdə keçirilən görüşdən sonra Kiyevə hərbi yardımın müvəqqəti dayandırıldığını açıqlamışdı.
