BAKI, AzerVoice
Suriyanın cənubunda atəşkəs İsrailin intensiv hərbi əməliyyatları nəticəsində güc yolu ilə əldə edilib və Suriya qoşunları Dəməşqə geri çəkilməyə məcbur qalıb.
AzerVoice xəbər verir ki, bu barədə İsrailin baş naziri Benyamin Netanyahu açıqlama verib.
O, İsrailin Dəməşqin cənubundakı ərazilərin demilitarizasiyası istiqamətində aydın siyasət yürütməyə davam etdiyini bildirib.
“İsrailin intensiv fəaliyyəti nəticəsində atəşkəs əldə olundu və Suriya ordusu Dəməşqə çəkildi. Bu, güc yolu ilə əldə olunmuş bir atəşkəsdir. Biz yeddi cəbhədə güc yolu ilə sülh, güc yolu ilə sakitlik, güc yolu ilə təhlükəsizlik yaradırıq” - deyə, o qeyd edib
“Biz Suriyaya dair iki cür siyasət formalaşdırmışıq. Colan təpələrindən Cəbəl əd-Druz bölgəsinə qədər olan ərazinin silahsızlaşdırılması və Suriyadakı druzların müdafiəsi” - deyə, Baş nazir əlavə edib.
Netanyahu, 13 iyul tarixində baş verən hadisələrdən sonra İsrail Müdafiə Ordusuna druzları qorumaq üçün qətiyyətli şəkildə hərəkət etməyi əmr etdiyini də qeyd edib:
“Hərbi Hava Qüvvələrimiz qatil dəstələri və zirehli texnikanı hədəf aldı. Mən həmçinin Suriya ordusunun Baş Qərargah binasının də hədəf siyahısına daxil edilməsini əmr etdim”.
Xatırladaq ki, 13 iyul tarixində Suriyanın Suveyda vilayətində ərəb qəbilələrinin döyüşçüləri ilə druz dəstələri arasında qarşıdurmalar baş verib. İyulun 15-də Suriya ordusu vilayətin inzibati mərkəzinə daxil olaraq, bölgədə sabitliyi təmin etmək üçün əməliyyatlara başlayıb. Ardınca İsrail, druz əhalisini qorumaq məqsədi ilə Suriyanın hərbi kolonlarını hədəfə almağa başladığını bəyan edərək hava hücumları həyata keçirməyə başlayıb.
16 iyul tarixində İsrail Hərbi Hava Qüvvələri Dəməşq və onun ətrafındakı bir sıra strateji obyektlərə, o cümlədən Suriya ordusunun Baş Qərargah kompleksinə, Əbu-Rummana rayonundakı Prezident Sarayına və paytaxtın qərbində yerləşən Mezze hərbi hava bazasına hava zərbələri endirib. Bu zərbələr nəticəsində Suriya təhlükəsizlik qüvvələrinin beş əməkdaşı həlak olub.
Məlumat üçün bildirək ki, druzlar – Suriya, Livan, İsrail və İordaniyada yaşayan, ərəb dilli və dini baxımdan özünəməxsus etnokonfessional qrupdur. Suriyada təxminən 700 min druz yaşayır ki, bu da kürdlər və ələvilərdən sonra ölkədəki üçüncü ən böyük dini-etnik azlıqdır.
