Türkiyə və Pakistan İsrail hücumları zamanı cəsarətli mövqe nümayiş etdirdi - İran

İran Türkiyə və Pakistanı İsrail-ABŞ hücumları zamanı göstərdikləri “cəsarətli” mövqeyə görə təşəkkür edib.

AzerVoice xəbər verir ki, İran hökumətinin sözçüsü Fatma Mühacirani bu barədə açıqlama yayıb.

Mühacirani İsrailin İrana qarşı hücumlarında 102-si qadın, 38-i uşaq olmaqla cəmi min 62 nəfərin həyatını itirdiyini bildirərək, ən çox ölüm sayının 265 ölümlə Tehrandakı hücumlarda meydana gəldiyini vurğulayıb.

“Bu müddət ərzində və əlbəttə ki, əvvəlki hökumətdən bəri qonşu ölkələr və təşkilatlarla qurulan yaxşı əlaqələri nəzərə alaraq, Şanxay Əməkdaşlıq Təşkilatı və daha sonra BRİKS Braziliyada keçirilən toplantıda bu məsələni pisləyib. Biz qonşu ölkələrdən, o cümlədən Pakistan və Türkiyədən çox aydın mövqe nümayiş etdirən çox cəsarətli mövqelərin şahidi olduq”- deyə Mühacirani qeyd edib.

İran hökumətinin sözçüsü bələdiyyə Tehrandakı hücumlar nəticəsində zədələnmiş yaşayış evlərinin təmiri və ya yenidən qurulması üçün qaydalar hazırladığını bildirib.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.

Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.

ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.

İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.