BAKI, AzerVoice
Əgər Fələstin dövləti dediyiniz bir şeyi istəyirsinizsə, onu Londonda, Parisdə, öz ölkələrinizdə qurun.
AzerVoice xəbər verir ki, bu sözləri İsrail Parlamentinin (Knesset) sədri Amir Ohana, Cenevrədə keçirilən 6-cı Dünya Parlament Sədrləri Konfransında çıxış edərkən deyib
O, Fələstin dövlətinin tanınmasını HƏMAS-ın mükafatlandırılması kimi qiymətləndirib və bu addımın bölgəyə sabitlik gətirməyəcəyini iddia edib.
Xatırladaq ki, Fransa Prezidenti Emmanuel Makron iyunun 24-də verdiyi bəyanatda Fələstin dövlətini tanımaq qərarına gəldiyini və bu barədə rəsmi açıqlamanı sentyabrda keçiriləcək BMT Baş Assambleyasında verəcəyini bildirmişdi. Böyük Britaniyanın Baş naziri Kir Starmer isə dünənki açıqlamasında, İsrailin müəyyən şərtləri yerinə yetirməyəcəyi və Qəzzada atəşkəsi qəbul etməyəcəyi təqdirdə, ölkəsinin sentyabrda keçiriləcək BMT Baş Assambleyasında Fələstin dövlətini tanıyacağını bəyan etmişdi.
Qeyd edək ki, Fələstin BMT-nin 148 üzv dövləti tərəfindən tanınıb. 95 ölkədə Fələstinin səfirlikləri və daimi nümayəndəlikləri fəaliyyət göstərir. “İki dövlət – iki xalq üçün” prinsipi 1967-ci il sərhədləri daxilində, paytaxtı Şərqi Qüds olan müstəqil Fələstin dövlətinin yaradılmasını nəzərdə tutur.
