BAKI, AzerVoice, Səməd Əyyubov – ABŞ administrasiyasının cümə günü Rusiyaya qarşı ikinci dərəcəli sanksiyalar tətbiq edə biləcəyi gözlənilir.
AzerVoice xəbər verir ki, bu barədə Ağ Evin nümayəndəsi məlumat verib.
“Hələ də gözlənilir ki, ikinci dərəcəli sanksiyalar cümə günü tətbiq olunacaq” - deyə, onun sözlərini "Axios" portalı sitat gətirib.
ABŞ Prezidenti Donald Tramp daha əvvəl bildirmişdi ki, Rusiya və Ukrayna arasında razılaşma əldə olunması üçün 50 günlük müddət verib, əks halda Moskva və onun ticarət tərəfdaşlarına qarşı 100 faizlik gömrük rüsumları tətbiq edəcək. İyulun 29-da o, Rusiyadan və nizamlama prosesindəki irəliləyişdən məyus olduğunu, buna görə də müddəti 10 günə endirdiyini açıqlamışdı.
ABŞ-ın BMT-dəki müvəqqəti işlər vəkilinin müavini Con Kelli isə iyulun 31-də bildirib ki, Tramp Rusiya və Ukraynanın avqustun 8-ə qədər sülh sazişi ilə bağlı razılığa gəlməli olduğunu düşünür. Rusiya prezidentinin mətbuat katibi Dmitri Peskov isə bunu nəzərə aldıqlarını deyib.
