BAKI, AzerVoice, Səməd Əyyubov
Fransa Prezidenti Emmanuel Makron bildirib ki, “İstəklilər koalisasiyası”nın 26 üzv dövləti atəşkəs çərçivəsində Ukraynaya təhlükəsizlik qüvvələri yerləşdirməyi öhdəsinə götürüb.
AzerVoice xəbər verir ki, Makron ABŞ-ın, Ukraynanın, Avropa ölkələrinin və Koalisiya üzvlərinin Rusiya-Ukrayna müharibəsində sülhün tərəfdarı olduqlarını vurğulayıb.
“Rusiya 2022-ci ildə müharibəni seçən yeganə ölkə idi. Necə ki, 2008-ci ildə Gürcüstanda, 2014-cü ildə isə Krım və Donbasda eyni addımı atmışdı. Rusiya bu gün də müharibəni davam etdirməyi, bəzən isə tərəfdaşların üstüörtülü razılığı ilə onu daha da şiddətləndirməyi seçən ölkədir” – deyə, o qeyd edib.
Makron əlavə edib ki, Ukrayna müharibəni seçməyib və ABŞ prezidenti Donald Tramp qeyd-şərtsiz atəşkəsi qəbul edib.
Fransa prezidenti Rusiyanın daim bəhanələr gətirdiyini, vaxt udmağa çalışdığını və müharibəni davam etdirmək istədiyini bildirib. O, dəqiq rəqəmləri açıqlamasa da, “Rusiyanın Ukrayna ərazisinin 1 faizindən azını əldə etmək üçün cəbhədə 1 milyondan çox əsgərini itirdiyini” vurğulayıb.
Makron bütün sülh danışıqlarında əsas şərt kimi Rusiyanın ağır itkilər verdiyi ərazilərdən Ukrayna ordusunun geri çəkilməsini tələb etməsini “mənəvi baxımdan qəbuledilməz, hüquqa zidd və qeyri-mümkün” adlandırıb. O, danışıqların yalnız atəşkəs və ya sülh sazişi ilə yanaşı Ukrayna üçün güclü təhlükəsizlik zəmanətləri təmin olunduğu halda mümkün ola biləcəyini vurğulayıb.
Fransa prezidenti əlavə edib ki, “İstəklilər koalisasiyası”nın 26 ölkəsi atəşkəs çərçivəsində Ukraynada quru, dəniz və ya hava qüvvələri ilə iştirak etməyi öhdəsinə götürüb. Onun sözlərinə görə, bu qüvvələrin məqsədi Rusiyaya qarşı müharibə aparmaq deyil, sülhü və təhlükəsizliyi təmin etməkdir. Makron həmçinin Koalisiyanın 35 üzvünün Ukraynaya sülh və təhlükəsizlik zəmanətləri ilə bağlı hərbi və siyasi töhfələrini dəqiqləşdirdiyini, müzakirələrin Ukrayna ordusunun imkanlarını məhdudlaşdırmamaq üzərində qurulduğunu qeyd edib.
