BAKI, AzerVoice, Fərid Mikayılov
Suriya Xarici İşlər Naziri Əsəd Şeybani ABŞ-a səfər edəcək.
AzerVoice xəbər verir ki, məqsəd Suriyaya qarşı qüvvədə qalan sanksiyaların tamamilə ləğv olunması və bölgədə təhlükəsizlik əməkdaşlığı məsələlərinin müzakirəsidir.
Şeybaninin Vaşinqtona bu səfəri 25 ildən artıq müddətdən sonra bir Suriya xarici işlər nazirinin ABŞ-a ilk səfəri olacaq. Səfər həm də ABŞ-ın İsrail və Suriya arasında yeni təhlükəsizlik razılaşması əldə etmək üçün vasitəçilik cəhdləri fonunda baş tutur.
ABŞ senatoru Lindsey Qraham, açıqlamasında, bu gün bir neçə senatorla birlikdə Şeybani ilə görüşərək “Sezar sanksiyalarının” qalıcı olaraq aradan qaldırılması məsələsini müzakirə etməyi planlaşdırdıqlarını bildirib.
Sezar sanksiyaları nədir?
2020-ci ilin iyununda qüvvəyə minən “Sezar Suriya Mülki Müdafiə Qanunu” Suriyanı və xüsusən də enerji, inşaat və maliyyə sahələrində Suriya əməkdaşlıq edənləri hədəf alır. Qanun adını işgəncə qurbanlarının fotolarını sızdıran keçmiş suriyalı hərbi qulluqçudan götürüb.
ABŞ prezidenti Donald Tramp administrasiyası müəyyən dövrlərdə müvəqqəti güzəştlər tətbiq etsə də, onların tam ləğvi üçün yalnız Konqresin səsverməsi tələb olunur. Senator Qraham isə dəstəyi üçün Suriyanın İŞİD-ə qarşı koalisiyaya rəsmi qoşulmasını və İsraillə təhlükəsizlik razılaşması imzalamasını şərt qoyduğunu deyib.
Şeybani cümə günü həmkarı Marko Rubio ilə də görüşəcək. Bundan öncə isə o, Londonda İsrailin Strateji İşlər naziri Ron Dermerlə regional təhlükəsizlik məsələlərini müzakirə edib.
