BAKI, AzerVoice, Fərid Mikayılov
İran, Çin, Pakistan və Rusiya xarici işlər nazirləri BMT Baş Assambleyasının 80-ci sessiyası çərçivəsində Nyu-Yorkda Əfqanıstan mövzusunda dördtərəfli görüş keçirib və birgə bəyanat qəbul ediblər.
AzerVoice xəbər verir ki, Rusiyanın təşəbbüsü ilə keçirilən toplantıda nazirlər Əfqanıstandakı son vəziyyəti müzakirə edərək, ölkənin müstəqil, vahid və sabit dövlət olaraq qalmasının vacibliyini vurğulayıblar.
Onlar terrorizm, müharibə və narkotiklərdən azad bir Əfqanıstanı dəstəklədiklərini bəyan ediblər.
Bəyanatda, ölkənin ağır humanitar böhrandan çıxması üçün davamlı iqtisadi əməkdaşlıq və regional inteqrasiyanın əhəmiyyətinə diqqət çəkilib. Nazirliklər Əfqanıstanla ticarət və iqtisadi əlaqələrin genişləndirilməsinə hazır olduqlarını bildiriblər.
Nazirlər Əfqanıstanda fəaliyyət göstərən İŞİD, əl-Qaidə, ETİM, TTP, Ceyş əl-Ədl, BLA və digər qrupların regional təhlükəsizlik üçün ciddi təhdid yaratdığını qeyd ediblər. Onlar narkotik istehsalına qarşı mübarizənin gücləndirilməsini, xüsusən sintetik narkotiklərin artımına qarşı tədbirlərin görülməsini vacib sayıb.
Bəyanatda həmçinin 1988-ci il sanksiya rejiminin yumşaldılmasının zəruriliyi vurğulanıb. Taliban siyahısında olan şəxslərə səyahət qadağasının yumşaldılması, inklüziv yanaşmaya töhfə verəcək addım kimi dəyərləndirilib.
Qaçqınlar və humanitar dəstək
İran və Pakistanda milyonlarla qaçqına ev sahibliyi edilməsinə görə təşəkkür bildirən nazirlər, beynəlxalq ictimaiyyəti qaçqınların təhlükəsiz geri qayıdışı və inteqrasiyası üçün davamlı maliyyə və texniki dəstək verməyə çağırıblar. Humanitar yardımların isə siyasi şərtlərdən uzaq şəkildə çatdırılması tələb olunub.
Dördlük, Əfqanıstanda bütün ictimai qrupları əhatə edən idarəçilik sisteminin yaradılmasını vacib hesab edib. Qadınların və qızların təhsil, məşğulluq, iqtisadi imkanlar və əsas xidmətlərə çıxışının təmin olunmasının ölkənin sülhü və sabitliyi üçün mühüm olduğu qeyd olunub.
Nazirlər NATO ölkələrini Əfqanıstanın hazırkı vəziyyətinə görə məsuliyyət daşımağa çağırıb və beynəlxalq sanksiyaların ləğvini, Əfqanıstanın dondurulmuş aktivlərinin azad edilməsini tələb ediblər. Xarici hərbi bazaların regionda yerləşdirilməsinə qarşı çıxaraq, bunun regional sülh və təhlükəsizliyə zərər vuracağı bildirilib.
