BAKI, AzerVoice, Fərid Mikayılov
İran Xarici İşlər Nazirliyinin sözçüsü İsmayıl Bəqai İsrail qüvvələrinin Qəzzaya istiqamətlənmiş Əzm Flotiliyasına hücumunu və fəalların saxlanmasını kəskin şəkildə pisləyib.
AzerVoice xəbər verir ki, nazirlik rəsmisi bəyanatında İsrailin mülki fəalların rəhbərlik etdiyi gəmilərə qarşı hücumunu “beynəlxalq prinsiplərin açıq-aşkar pozulması” və “terror aktı” kimi qiymətləndirib.
O, flotiliyada iştirak edən və müxtəlif ölkələrdən gəlmiş parlament üzvləri, hüquqşünaslar və fəalların humanitar səylərini yüksək dəyərləndirib.
Bəqai Qəzzada mülki əhaliyə qarşı davam edən qətliamları və etnik təmizləməni vurğulayaraq, bütün dövlətlərin “işğal altındakı Fələstində soyqırımı dayandırmaq” üçün hüquqi, mənəvi və humanitar məsuliyyət daşıdıqlarını bildirib. O, beynəlxalq ictimaiyyəti baş verənlərə qarşı dərhal və qətiyyətli addımlar atmağa çağırıb.
Xatırladaq ki, 40-dan çox gəmidən ibarət və 500-ə yaxın iştirakçını əhatə edən Qlobal Əzm Donanması İsrailin Qəzza blokadasına qarşı ən böyük mülki müqavimət təşəbbüslərindən biri hesab olunur. Çərşənbə günü axşamı İsrail qüvvələri beynəlxalq sularda 13 gəmini ələ keçirərək 37 ölkədən 200-dən çox şəxsi saxlayıb. Hadisə dünya miqyasında etirazlara və diplomatik gərginliyə səbəb olub.
