BAKI, AzerVoice, Nailə Babazadə
Birləşmiş Millətlər Təşkilatının (BMT) Yaxın Şərqdəki Fələstinli Qaçqınlara Yardım və İmar Agentliyi (UNRWA), İsrailin hücumları altındakı Qəzza Zolağında on minlərlə fələstinlinin böyük bədəl ödəyərək davamlı köçə məcbur edildiyini bildirib.
AzerVoice xəbər verir ki, UNRWA-nın ABŞ mərkəzli X şirkətinə məxsus sosial media platformasında yayımladığı açıqlamada, İsrailin 7 oktyabr 2023-cü ildən bəri blokada altında saxlayaraq bombaladığı Qəzzadakı məcburi köç məsələsinə diqqət çəkilib.
Açıqlamada, Qəzzada ağır humanitar şəraitdə on minlərlə fələstinlinin böyük bədəllər ödəyərək təkrar-təkrar köç etməyə məcbur qaldığı qeyd olunaraq bildirilib:
"Fələstinli ailələr davamlı şəkildə böyük bədəl ödəyərək evlərini tərk etməyə məcbur edilir. Bölgədə isə ərzağa, suya və təhlükəsizliyə çıxış son dərəcə məhduddur."
Açıqlamada Qəzza Zolağında dərhal atəşkəsin təmin edilməsinin zəruriliyi vurğulanıb və bölgədəki fələstinli əhalinin acılarının yüngülləşdirilməsi üçün humanitar yardımların çatdırılmasına qoyulan maneələrin aradan qaldırılması çağırışı edilib.
İsrailin hücumları və humanitar yardımın qarşısını alan ciddi blokadası altındakı Qəzza Zolağı aclığın yayıldığı, su, dərman, tibbi ləvazimat və gigiyena vasitələrinin tapılmadığı bir humanitar fəlakət yaşayır.
Xüsusilə uşaqlar başda olmaqla, Qəzza Zolağında aclıqdan ölüm halları artır. Yerli və beynəlxalq dairələr İsrailin "aclığı və susuzluğu silah kimi" istifadə etdiyini bildirir.
Sivil infrastrukturu da dağıdaraq Qəzzanın 88%-ni yerlə-yeksan edən İsrail ordusu, sürgün əmrləri ilə yerindən etdiyi fələstinliləri tez-tez sığındıqları bölgələrdə hədəf alır.
Təxminən 2,3 milyon əhalisi olan Qəzzada İsrailin hücumları və sürgün əmrləri nəticəsində yerindən edilənlərin sayının 2 milyona çatdığı, çox sayda insanın dəfələrlə köç etməyə məcbur qaldığı bildirilir.
Ən əsas ehtiyaclardan məhrum şəkildə yerindən edilən fələstinlilər yararsız çadırlarda və ya həddindən artıq sıxlıq olan, gigiyenik vasitələrin çatışmadığı, tualetlərin belə yetərli olmadığı, yoluxucu xəstəliklərin yayıldığı məktəblərdə sağ qalmağa çalışırlar.
İsrail ordusu isə hər gün keçirdiyi hücumlarla yerindən edilənlərin yaşadığı çadırları və mülki obyektləri bombalayır.
