BAKI,AzerVoice, Orxan Qədirzadə
Səudiyyə Ərəbistanının Pakistana planlaşdırdığı 10 milyard dollarlıq investisiya öhdəliyi dəyişməyib və tərəflər artıq qısamüddətli maliyyə dəstəyindən uzunmüddətli, şirkətlərarası (B2B) iqtisadi əməkdaşlıq modelinə keçid edir.
AzerVoice xəbər verir ki, bu barədə Pakistanın maliyyə naziri Məhəmməd Əurəncəb açıqlama verib.
Nazirin sözlərinə görə, Səudiyyə Ərəbistanı kommersiya əsaslı investisiyalara hazırdır və prosesin növbəti mərhələsi İslamabadın maliyyələşə bilən layihələr təqdim etməsindən asılı olacaq.
“Səudiyyə tərəfi hazırdır. İndi biz investisiya oluna bilən, banklar tərəfindən maliyyələşdirilə bilən layihələr təqdim etməliyik.”-nazir deyib.
Əurəncəb bildirib ki, Pakistan artıq makroiqtisadi sabitləşmə mərhələsinə keçib, inflyasiya azalıb, valyuta ehtiyatları artıb və beynəlxalq reytinq agentlikləri ölkəyə dair proqnozları yüksəldib. Bu isə xarici investisiyanın cəlb olunmasına şərait yaradır.
Səudiyyə sərmayələrinin mədənçilik və strateji faydalı qazıntılar, informasiya texnologiyaları, kənd təsərrüfatı və ərzaq təhlükəsizliyi, turizm və xidmət sektoru, istehsal sənayesi kimi sahələrə yönəldilməsi planlaşdırılır.
Nazir qeyd edib ki, Bəlucistandakı Reko Diq mis-qızıl yatağı üzrə maliyyə razılaşması yekun mərhələdədir və layihə Səudiyyənin Manara Minerals konsorsiumunun diqqət mərkəzindədir. Razılaşmaya əsasən, Səudiyyə tərəfi layihədə 15 faiz pay almağa hazırdır.
Layihənin ilk mərhələsində təxminən 2,8 milyard dollarlıq ixrac gəliri əldə olunacağı gözlənilir ki, bu da Pakistanın hazırkı illik ixracının təxminən 10 faizi deməkdir.
Əurəncəb bildirib ki, iki ölkə münasibətləri artıq humanitar və maliyyə yardımından kənara çıxaraq ticarət və investisiya əsaslı əməkdaşlıq formatına keçir.
“Bu yardım deyil. Gələcək iqtisadi əməkdaşlığı ticarət və investisiya istiqamətləndirəcək.”-deyə nazir deyib.
Onun sözlərinə görə, yeni mərhələdə dövlət deyil, özəl sektor prosesə rəhbərlik edəcək və Səudiyyə Ərəbistanı bu transformasiyada əsas tərəfdaşlardan biri olacaq.
