BAKI, AzerVoice, Fərid Mikayılov
Dəməşqdə Suriya təhlükəsizlik qüvvələri ilə ABŞ-ın başçılıq etdiyi beynəlxalq antiterror koalisiyasının birgə keçirdiyi əməliyyat nəticəsində terror təşkilatı İŞİD-in sözdə Dəməşq üzrə məsul şəxsi və onun bir neçə köməkçisi saxlanılıb.
AzerVoice xəbər verir ki, Suriyanın rəsmi dövlət televiziyası El-İhbariyye Daxili İşlər Nazirliyindəki mənbəyə istinadən bildirib ki, əməliyyat koalisiya qüvvələri və ölkənin daxili təhlükəsizlik bölmələrinin koordinasiyası ilə həyata keçirilib.
Nəticədə İŞİD-in sözdə Dəməşq üzrə məsul şəxsi, “Əbu Ömər Tayba” ləqəbli Taha əz-Zubi ələ keçirilib.
Dəməşq Kənd Əraziləri üzrə Daxili Təhlükəsizlik Komandanı Əhməd Dalati qeyd edib ki, uzunmüddətli kəşfiyyat və izləmə tədbirlərindən sonra Muaddamiyyə rayonunda İŞİD-ə məxsus hücrəyə qarşı birgə əməliyyat təşkil olunub. Əməliyyatda Daxili İşlər Nazirliyi, Baş Kəşfiyyat İdarəsi və beynəlxalq koalisiya qüvvələri iştirak edib.
Dalati bildirib ki, əməliyyat zamanı “Əbu Ömər Tayba” kod adlı Taha əz-Zubi və onun bəzi köməkçiləri üzərlərində partlayıcı kəmərlərlə birlikdə saxlanılıb. Faktla bağlı istintaq tədbirləri davam etdirilir.
