BAKI,AzerVoice, Fərid Mikayılov
İranın xarici işlər naziri Abbas Əraqçi Almaniya kansleri Fridrix Mertsin son açıqlamalarına sərt reaksiya verib. Nazir Almaniyanın bir vaxtlar Avropanın inkişafının “mühərriki” olduğunu, lakin hazırda “geriləmənin mühərrikinə” çevrildiyini bildirib.
AzerVoice xəbər verir ki, Əraqçi sosial şəbəkə paylaşımında qeyd edib ki, ötən ilin sentyabrında Nyu-Yorkda Mertsin təkidi ilə E3 formatı İranla nüvə danışıqlarındakı rolundan faktiki olaraq imtina edib və BMT sanksiyalarının bərpası istiqamətində addımlar atılıb.
Onun sözlərinə görə, eyni siyasətin müəllifi olan Merts indi yenidən həmin danışıqlara qayıtmağa çalışır.
İran XİN rəhbəri Almaniya kanslerini siyasi sadəlövhlükdə və məsuliyyətsiz mövqedə ittiham edib. O, 2025-ci ilin iyununda İsrailin zərbələri nəticəsində min nəfərdən çox iranlının həlak olmasını xatırladaraq, həmin dövrdə Mertsin bu hadisələri “sevinc”lə qarşıladığını iddia edib. Əraqçi həmçinin kanslerin İranın guya “bir neçə həftəyə çökməsi” ilə bağlı açıqlamalarını reallıqdan uzaq adlandırıb.
Nazir vurğulayıb ki, Alman xalqı tarix boyu zəhmətkeşliyi və yenilikçi düşüncəsi ilə bəşəriyyətə böyük töhfələr verib və İran hər zaman Berlinlə güclü münasibətlərin tərəfdarı olub. Buna görə də, onun fikrincə, hazırkı siyasi ritorika Almaniyanın beynəlxalq nüfuzuna zərər vurur.
Əraqçi bəyanatını Almaniyada daha yetkin və məsuliyyətli siyasi liderliyin yenidən önə çıxacağına ümid etdiyini bildirərək yekunlaşdırıb.
