BAKI,VOA, Fərid Mikayılov
Pakistan və Əfqanıstan arasında davam edən gərginliyin azaldılması üçün yeni diplomatik təşəbbüs irəli sürülüb.
VOA xəbər verir ki, iki ölkə Çin vasitəçiliyi ilə atəşkəs əldə etmək məqsədilə danışıqlara başlayıb.
Bildirilir ki, tərəflərin nümayəndələri Sincan-Uyğur Muxtar Bölgəsinin paytaxtı Urumçidə bir araya gəlib.
Rəsmi Pekin və İslamabad hələlik bu məlumatları təsdiqləməsə də, Pakistan rəsmilərinin Çinlə bu prosesdə zəmanətçi rolunun müzakirəsini apardığı qeyd olunur.
Məlumata görə, Pakistan prezidenti Asif Əli Zərdari regiondakı vəziyyətlə bağlı Çin səfirliyində görüşlər keçirib, Pakistanın xarici işlər naziri Məhəmməd İshaq Dar isə Pekinə səfəri zamanı bu məsələni gündəmə gətirib.
Eyni zamanda, Əfqanıstandan xarici işlər, daxili işlər, müdafiə və kəşfiyyat strukturlarını təmsil edən nümayəndə heyətinin də danışıqlar üçün Çinə yola düşdüyü bildirilir.
Qeyd edək ki, Pakistan və Əfqanıstan arasında son gərginlik fevral ayında sərhəd bölgələrində qarşılıqlı hücumlarla başlamış, tərəflər bir-birini terror fəaliyyətinə dəstək verməkdə ittiham etmişdi.
