BAKI,VOA, Fərid Mikayılov
İsrailin Baş naziri Benyamin Netanyahu ABŞ Prezidenti Donald Trampla keçirdiyi görüşdə bildirib ki, İsrail Vaşinqtonun razılığı olmadan öz təşəbbüsü ilə İrana zərbə endirməyəcək.
VOA xəbər verir ki, Associated Press agentliyinin İsrail mənbələrinə istinadən yaydığı məlumata görə, Netanyahu eyni zamanda vurğulayıb ki, İran İsrailə hücum edəcəyi təqdirdə ölkəsi cavab zərbələri endirmək hüququnu özündə saxlayır.
Baş nazir, həmçinin İsrailin İranla bağlı əldə etdiyi yeni kəşfiyyat məlumatlarını ABŞ ilə bölüşməyə davam edəcəyini bildirib. Onun sözlərinə görə, Vaşinqtonun İranla bağlı siyasətində Yaxın Şərqdəki ərəb müttəfiqlərinin mövqeyini nəzərə almasını anlayışla qarşılayırlar.
Məlumata əsasən, Netanyahu Trampa İsrailin İran məsələsində ABŞ rəhbərliyinə tam etibar etdiyini və Vaşinqtonun qəbul edəcəyi istənilən qərarı dəstəkləyəcəyini də çatdırıb.
Qeyd edək ki, Donald Tramp və Binyamin Netanyahu arasında iyulun 28-də keçirilən görüş təxminən 90 dəqiqə davam edib.
