BAKI,VOA Orxan Qədirzadə
Avropa İttifaqına (Aİ) üzv ölkələrin daxili işlər nazirləri İspaniyanın idarəçiliyində olan Sebta şəhərində yaranmış miqrasiya böhranını müzakirə etmək üçün bu gün videokonfrans formatında fövqəladə iclas keçirəcəklər.
Toplantının əsas məqsədi son günlər on minlərlə miqrantın Mərakeşdən İspaniyanın Şimali Afrikadakı Sebta şəhərinə qeyri-qanuni keçidindən sonra yaranmış vəziyyəti qiymətləndirmək və Aİ-nin miqrasiya siyasətinə dair ortaq yanaşma formalaşdırmaqdır.
Miqrantların quru və dəniz yolu ilə sərhədi keçməsini əks etdirən görüntülər Avropa ölkələri arasında miqrasiya siyasəti ilə bağlı fikir ayrılıqlarını daha da dərinləşdirib.
İtaliya, Danimarka, Almaniya və Macarıstan da daxil olmaqla 22 Aİ üzvü ölkə qeyri-qanuni miqrasiyaya qarşı daha sərt tədbirlərin görülməsini tələb edərək, İspaniyanın son addımlarının "Avropaya qapıların açıq olduğu" təəssüratı yaratdığını bildirib.
Bu ölkələr fövqəladə videokonfransın keçirilməsini dəstəkləsələr də, məqsədlərinin qeyri-qanuni miqrasiyaya qarşı daha sərt siyasətin davam etdirilməsi olduğunu vurğulayıblar.
Buna qarşılıq, İspaniyanın Baş naziri Pedro Sançes Avropa institutlarının rəhbərlərinə ünvanladığı məktubda bəzi üzv dövlətlərin mövqeyini "eqoist yanaşma" kimi qiymətləndirərək, Aİ daxilində həmrəylik nümayiş etdirilməsinə çağırıb.
Madrid həmçinin bəzi ölkələrin İspaniyanın Şengen zonasından çıxarılması ilə bağlı səsləndirdiyi fikirlərə etiraz edib. Hüquqi ekspertlər isə bildirirlər ki, belə bir addım mövcud Aİ qanunvericiliyinə əsasən mümkün deyil.
Fransa isə 22 ölkənin təşəbbüsünə qoşulmayıb. Paris Sebtadakı vəziyyətin siyasi məqsədlərlə istifadə edilməsinin doğru olmadığını bildirib və sərhədi qanunsuz keçən miqrantların böyük əksəriyyətinin artıq Mərakeşə geri qaytarıldığını qeyd edib.
Avropa Komissiyasının sədri Ursula fon der Lyayen videokonfransı Aİ üçün "ortaq dərslərin çıxarılması" və sərhədlərin qorunmasının gücləndirilməsi baxımından mühüm fürsət kimi qiymətləndirib.
Fon der Lyayen Aİ ölkələrini qeyri-qanuni miqrasiyanın qarşısının alınması məqsədilə tərəfdaş ölkələrlə əməkdaşlığın genişləndirilməsi, xarici sərhədlərin daha etibarlı qorunması, erkən xəbərdarlıq sistemlərinin tətbiqi, insan alveri və miqrant qaçaqmalçılığı şəbəkələrinin dağıdılması, eləcə də qanunsuz miqrantların geri qaytarılması mexanizmlərinin gücləndirilməsi istiqamətində fəaliyyətini artırmağa çağırıb.
Qeyd edək ki, Avropa İttifaqı son aylarda miqrasiya siyasətini daha da sərtləşdirərək, sığınacaq müraciəti rədd edilən şəxslərin ittifaq hüdudlarından kənarda yaradılan xüsusi geri qaytarma mərkəzlərinə göndərilməsinə imkan verən yeni mexanizmləri də gündəmə gətirib.
