BAKI, AzerVoice
OpenAI yeni ChatGPT agenti ilə süni intellektin sərhədlərini genişləndirir.
AzerVoice xəbər verir ki, OpenAI
şirkəti mürəkkəb tapşırıqları avtonom şəkildə yerinə yetirə bilən
yeni “ChatGPT Agent” məhsulunu təqdim edib.
Şirkətin baş direktoru Sem Altman bu proqram təminatını süni
intellekt sistemləri üçün “yeni qabiliyyət səviyyəsi” adlandırıb.
Yeni agent real kompüterdən istifadə etməklə istifadəçinin əvəzinə
təqdimatlar hazırlayır, onlayn alış-veriş edir və məlumatları emal
edir.
Canlı təqdimatda ChatGPT agentinin isti hava üçün gəlinlik sifariş etdiyi, komanda üçün maskot temalı stikerlər dizayn etdiyi və Google Diskdəki məlumatlara əsasən təqdimat yaratdığı nümayiş etdirilib. Altman bildirib ki, bu texnologiya planlaşdırma və icra qabiliyyəti ilə “AGI – süni ümumi intellekt kimi hiss etdirir”, lakin geniş tətbiq olunmadan əvvəl real şəraitdə sınaqlardan keçməlidir.
Qeyd edək ki, yeni ChatGPT agenti hazırda yalnız Pro, Plus və Komanda istifadəçiləri üçün əlçatandır. Bu məhsul, texnologiya şirkətləri arasında süni intellekt sahəsində artan rəqabətin fonunda təqdim olunub. OpenAI-nin bazar dəyəri artıq 300 milyard dollara çatıb.
