BAKI, AzerVoice, Nailə Babazadə
Birləşmiş Millətlər Təşkilatının Uşaqlara Yardım Fondu (UNICEF) sözçüsü Tess İngram, Qəzzada elan olunan atəşkəsə baxmayaraq bölgəyə kifayət qədər humanitar yardımın çatmadığını və minlərlə uşağın aclıq içində yatdığını bildirib.
AzerVoice xəbər verir ki,İngram Anadolu Agentliyinə açıqlamasında, atəşkəsin uşaqların hər gün bombardmanda ölməməsi baxımından müsbət addım olduğunu, lakin bunun aclığı və təhlükəsiz içməli su çatışmazlığını aradan qaldırmadığını vurğulayıb.
“Atəşkəs təkbaşına qıtlığı bitirmir və ya bir ailənin sabah içməli suya çıxışı olacağı anlamına gəlmir. Ailələr hələ də sağ qalmaq uğrunda mübarizə aparır. İnsanların güvəndiyi sistemlər dağılıb, su və tibbi yardıma çıxış çox məhduddur.” - deyə İngram qeyd edib.
UNICEF rəsmisi bildirib ki, atəşkəsdən sonra evlərinə dönən bir çox insan evlərinin yerlə-yeksan olduğunu görüb və yenidənqurma üçün dəstəyə ehtiyac duyur.
İngram, atəşkəsin ilk iki həftəsində Qəzzaya yardım axınının artmasının sevindirici olduğunu, lakin bunun hələ də kifayət etmədiyini qeyd edib.
“Yardımların səviyyəsi hələ də münaqişədən əvvəlki vəziyyətə çatmayıb. Yardımın böyük miqyasda və sürətli şəkildə bölgəyə daxil olması vacibdir. Uşaqlar qidalanma çatışmazlığı, soyuq və xəstəliklər səbəbindən ölmə riski altındadır.”
O, İsrail rəsmilərinə müraciət edərək, Qəzza zolağındakı bütün keçid məntəqələrinin açılmasını və humanitar yardımın geniş miqyasda çatdırılmasına imkan yaradılmasını tələb edib.
UNICEF sözçüsü əlavə edib ki, hazırda 650 min uşağın təhsildən uzaq qaldığını, 1 milyon uşağın isə içməli su və qidalara çıxışının olmadığını bildirib.
Ingram sonda qeyd edib ki, atəşkəsin humanitar baxımdan düzgün qiymətləndirilməməsi və uşaqların əziyyət çəkməyə davam etməsi “ürəkparçalayıcı” bir vəziyyətdir və beynəlxalq ictimaiyyətin bu uşaqlara kömək etmək üçün hələ də imkanları var.
