BAKI, AzerVoice, Nailə Babazadə
Cümə günü Parisdə Kral Hamad bin İsa Al Xəlifə ilə Prezident Emmanuel Makron arasında baş tutan danışıqlar zamanı Bəhreyn və Fransa arasında birgə müdafiə əməkdaşlığı sazişi imzalanıb.
AzerVoice xəbər verir ki, Fransa Prezident Administrasiyasından verilən məlumata görə, saziş müdafiə, təlim və strateji məlumat mübadiləsi sahəsində əməkdaşlığı möhkəmləndirir. Bəyanatda həmçinin qeyd olunub: “Bu saziş müdafiə sənayesi sahəsində əməkdaşlıq üçün yeni imkanlar açacaq, eyni zamanda artan gərginliklə səciyyələnən qlobal və regional geosiyasi mühitdə iki ölkə arasındakı həmrəyliyi gücləndirəcək”.
Sazişi Bəhreynin Milli Təhlükəsizlik Müşaviri və Ali Müdafiə Şurasının Baş katibi Şeyx Nasir bin Hamad Al Xəlifə və Fransanın Silahlı Qüvvələr və Veteranlar Nazirliyinin nümayəndəsi Alis Rufo imzalayıblar.
Bəhreyn Dövlət Xəbər Agentliyinin (BNA) məlumatına görə, Makron Bəhreyn və Fransa arasındakı tarixi münasibətlərin dərinliyini, habelə ortaq maraqlar naminə müxtəlif sahələrdə əldə olunan tərəqqini vurğulayıb. Öz növbəsində Kral Hamad Fransa prezidentinin iki ölkə arasındakı əlaqələrin möhkəmləndirilməsinə göstərdiyi diqqəti təqdir edib.
Danışıqlar zamanı bütün sektorlar üzrə ikitərəfli münasibətlərin inkişaf etdirilməsi yolları müzakirə olunub. Hər iki tərəf Bəhreyn-Fransa Birgə Ali Komitəsinin fəaliyyətini yüksək qiymətləndirib, əməkdaşlığın genişləndirilməsi üçün komitənin işinin davam etdirilməsinın vacibliyini qeyd ediblər.
Görüşdə həmçinin regional və beynəlxalq hadisələr, münaqişələrin dialoq və diplomatik yollarla həlli, eləcə də gərginliyin azaldılmasına yönəlmiş səylər müzakirə edilib.
