BAKI, VOA, Nailə Babazadə
Avropa İttifaqının ali nümayəndəsi Kaya Kallas, Aİ Xarici İşlər Nazirləri Toplantısı öncəsi verdiyi bəqlanatlarda Qəzza zolağında sülh prosesinin mühüm tərəfdaşı olmaq istədiklərini bəyan edib.
VOA xəbər verir ki, Kallas vurğulayıb ki, Fələstin polisinin təlim keçməsi və bölgədə asayişin təmin olunması üçün İsrail tərəfinin rəsmi icazəsi lazımdır. O, həmçinin İordaniya və Misirlə bu mövzuda razılıqların əldə olunduğunu diqqətə çatdırıb.
Ali nümayəndənin sözlərinə görə, Aİ-nin Rəfah Sərhəd Yardım Missiyası (EUBAM Refah) və Fələstin Əraziləri Polis Missiyası (EUPOL COPPS) sülh prosesində həlledici rol oynaya bilər. Kallas qeyd edib ki, "HƏMAS"ın silahsızlandırılması prosesində peşəkar Fələstin polisinə ehtiyac var və EUPOL COPPS bu sahədə lazımi dəstəyi verməyə hazırdır. Lakin bütün bu proseslərin icrası İsrailin təhlükəsizlik narahatlıqlarının aradan qaldırılması və onların onayı ilə mümkündür.
Brüsseldə keçirilən görüşün digər mühüm mövzusu isə Rusiyaya qarşı tətbiq ediləcək 20-ci sanksiyalar paketi olub. Kallas etiraf edib ki, hazırda bu paket üzərində üzv ölkələr arasında tam konsensus (yekdillik) yoxdur. Buna baxmayaraq, o, "Lazımi təzyiqi davam etdirəcəyik" deyərək Aİ-nin bu məsələdəki qətiyyətini nümayiş etdirib.
Kaya Kallas Rusiya-Ukrayna danışıqlarında Aİ-nin masa arxasında olmamasından daha çox, Rusiyanın hansı güzəştlərə gedəcəyinin əhəmiyyətli olduğunu bildirib. O, "Kimin Rusiya ilə danışdığından daha önəmli olan Rusiyanın nə kimi tavizlər verəcəyini görməkdir" deyərək, danışıqların keyfiyyətinə və nəticəsinə diqqət çəkib.
