BAKI, VOA, Nailə Babazadə

NATO, ABŞ Prezidenti Donald Trampın müttəfiqlərin Hörmüz boğazının təhlükəsizliyini təmin etməməsinin "Alyansın gələcəyi üçün çox pis" olacağı barədə xəbərdarlığından sonra rəsmi mövqeyini açıqlayıb.

VOA xəbər verir ki, adının açıqlanmasını istəməyən NATO rəsmisi bildirib ki, müttəfiqlər Şərqi Aralıq dənizində əlavə təhlükəsizliyi təmin etmək üçün artıq konkret addımlar atıblar. Bu addımlar regionda artan gərginlik fonunda dəniz nəqliyyatının və strateji su yollarının qorunmasına yönəlib.

Alyans rəsmisi qeyd edib ki, üzv ölkələr fərdi qaydada həm Hörmüz boğazındakı təhlükəsizlik vəziyyəti, həm də gələcəkdə atıla biləcək kollektiv addımlar barədə ABŞ və digər tərəfdaşlarla intensiv məsləhətləşmələr aparırlar. Bu açıqlama Trampın NATO-nu Hörmüz boğazında daha fəal rol oynamağa məcbur etməyə çalışdığı bir vaxtda verilib. Prezident Tramp müsahibəsində açıq şəkildə bildirmişdi ki, enerji daşıyıcılarının keçdiyi bu strateji boğazın qorunmasında Avropa müttəfiqlərinin iştirakı Alyansın gələcək taleyi üçün həlledicidir.

Hazırda NATO-nun Aralıq dənizindəki hərbi mövcudluğu həm kəşfiyyat, həm də raketdən müdafiə qabiliyyəti baxımından artırılmaqdadır. Ekspertlər hesab edirlər ki, Alyans Hörmüz boğazına birbaşa NATO bayrağı altında gəmi göndərmək yerinə, ilk növbədə Aralıq dənizindəki yükü öz üzərinə götürərək ABŞ-ın digər bölgələrdə manevr imkanlarını genişləndirməyə çalışır. Lakin Tramp administrasiyasının təzyiqləri davam edərsə, müttəfiqlərin "Koalisiya Qüvvələri" tərkibində Körfəz bölgəsinə daha böyük hərbi kontingent cəlb etməsi qaçılmaz ola bilər.