BAKI,VOA,Yusif Şərifzadə
SpaceX şirkətinin səhmləri ilk rüblük maliyyə hesabatından sonra kəskin ucuzlaşsa da, pərakəndə investorlar enişdən istifadə edərək alışlarını artırıblar.
VOA xəbər verir ki, Vanda Research şirkətinin məlumatına əsasən, çərşənbə günü ticarətin ilk saatında fərdi investorlar 22,7 milyon dollar həcmində xalis SpaceX səhmi alıblar.
Bu göstərici SpaceX-in birjaya çıxmasından sonra keçirilən 37 ticarət sessiyası ərzində ilk saat üzrə üçüncü ən yüksək alış həcmi hesab olunur.
Vanda Research bildirib ki, bu tendensiya pərakəndə investorların maliyyə hesabatından sonra yaranan enişdən daha fəal şəkildə yararlandıqlarını göstərir.
Şirkətin hesablamalarına görə, mövcud temp qorunarsa, çərşənbə günü SpaceX səhmlərinə xalis pərakəndə investisiyalar IPO-dan bəri ikinci ən yüksək göstəriciyə çata bilər. Rekord göstərici iyunun 16-da qeydə alınıb və həmin gün xalis alış 144,6 milyon dollar təşkil edib.
Məlumata görə, 12 iyun tarixində bir səhm üçün 135 dollar qiymətlə ABŞ tarixinin ən böyük ilkin kütləvi təklifini (IPO) həyata keçirən SpaceX-də indiyədək pərakəndə investorların xalis satış üstünlük təşkil etdiyi heç bir ticarət günü olmayıb.
Şirkətin səhmləri maliyyə hesabatından sonra 12,9 faizə qədər ucuzlaşıb. İnvestorlar gəlirli Starlink biznesinin bahalı süni intellekt investisiyalarını uzunmüddətli maliyyələşdirmək imkanları ilə bağlı narahatlıqlarını ifadə ediblər.
