Məlumatlı mənbənin cümə axşamı verdiyi açıqlamaya görə, ABŞ Prezidenti Donald Trampın nümayəndəsi və kürəkəni Cared Kuşner Qəzza ilə bağlı danışıqlar aparmaq məqsədilə gələn həftə İsrailə səfər edə bilər.

Daha əvvəl bu səfərin planlaşdırıldığını bildirən "Axios" saytı Kuşnerin gələn həftə Qahirədə Misir, Qətər və Türkiyədən olan vasitəçilərlə görüşmək niyyətində olduğunu da qeyd edib. Adının açıqlanmasını istəməyən mənbə "Reuters" agentliyinə bildirib: "Biz HƏMAS-ın tərksilah edilməsi məqsədində israillilərlə həmrəyik, lakin onlar qanuni narahatlıqlarını ifadə ediblər və biz bu məsələlərin həlli istiqamətində çalışırıq". Mənbə əlavə edib ki, Kuşnerin İsrailə səfərinin əsas hədəfi Trampın 2025-ci ilin sonlarında Qəzza üçün irəli sürdüyü "20 bəndlik plan"ın icrasında irəliləyiş əldə etmək üçün yol tapmaqdır.

Trampın qulağına kim nə pıçıldayır? İranın taleyi üçün Ağ Ev daxilində hakimiyyət mübarizəsi

Tramp iyulun sonlarında Fələstinin İslami Müqavimət Hərəkatının (HƏMAS) və Qəzzadakı digər silahlı qruplaşmaların tam şəkildə tərksilah olunması barədə razılaşmanın əldə edildiyini bəyan etmişdi. Tramp bildirmişdi ki, razılaşma mərhələli şəkildə həyata keçiriləcək; belə ki, tərksilah prosesi irəlilədikcə İsrail qüvvələri Qəzzadan paralel olaraq çıxarılacaq, beynəlxalq sabitləşdirmə qüvvələri isə bölgənin təhlükəsizliyini təmin etmək üçün yeni Fələstin polis qüvvəsi ilə birgə fəaliyyət göstərəcək.

Oktyabr ayında keçirilməsi nəzərdə tutulan seçkilərdə yenidən seçilməyə çalışan İsrailin Baş naziri Benyamin Netanyahu Trampın bu planını açıq şəkildə rədd edib. HƏMAS isə öz növbəsində planı qəbul etdiyini, lakin icranın ilk növbədə İsrailin öz öhdəliklərini — o cümlədən qoşunların çıxarılması və hücumların dayandırılmasını yerinə yetirməsi şərtinə bağlı olduğunu bəyan edib.

Oktyabrda elan edilmiş atəşkəs rejimi davamlı olaraq pozulur. Fələstin səhiyyə rəsmiləri atəşkəs elan olunduqdan bəri İsrailin hücumları nəticəsində əksəriyyəti mülki vətəndaş olmaqla 1250-dən çox fələstinlinin həlak olduğunu bildirirlər. İsrail statistikası isə dörd israilli hərbçinin silahlılar tərəfindən öldürüldüyünü göstərir. HƏMAS adətən öz itkilərini açıqlamır.

İsrailin hərbi əməliyyatları Qəzzada böyük dağıntılara yol açıb, on minlərlə insanın ölümünə, aclıq böhranına və bölgə əhalisinin tamamilə didərgin düşməsinə səbəb olub. Hüquq müdafiəçiləri, tədqiqatçılar və BMT-nin istintaq komissiyaları bölgədə baş verənləri soyqırım kimi qiymətləndiriblər.

İsrail isə öz növbəsində cavab verir ki, atdığı addımlar 2023-cü ilin oktyabrında HƏMAS-ın rəhbərlik etdiyi silahlıların 1200 nəfəri öldürməsi və 250-dən çox insanı girov götürməsi ilə nəticələnən hücumdan sonra özünümüdafiə çərçivəsində həyata keçirilir.