BAKI, AzerVoice, Nailə Babazadə
Türk millətinin taleyini əks etdirən tarix kitabı açıldıqda, ən parlaq səhifələrdən biri şübhəsiz ki, Türkiyə ilə Azərbaycan arasındakı dostluq və qardaşlığa həsr olunub. Bu bağ yalnız coğrafi yaxınlıqla deyil, ortaq dil, mədəniyyət, ədəbiyyat və tarixi yaddaşla formalaşmış sarsılmaz bir qardaşlıqdır. Hər iki xalq Oğuzun ocağında doğulmuş, eyni dastanlarla böyümüş, eyni türkülərlə sevinmiş, eyni acılara şərik olmuşdur.
Bu sözləri AzerVoice-ə özəl açıqlamasında UNEC-in Türk Dünyası İqtisad Fakültəsinin dekanı, Uludağ Universitetinin professoru Mehmet Yüce deyib.
Türkiyə ilə Azərbaycan arasındakı bu qardaşlıq tarix, mədəniyyət və ortaq tale üzərində inşa olunmuşdur. Son dövrlərdə Türkiyədə bəzi media orqanlarında yayımlanan saxta xəbərlər, bu münasibətlərə xələl gətirmək və iki ölkə arasında şübhə toxumu səpmək məqsədi güdən şüurlu və məqsədli cəhdlər ola bilər. Sosial media və bəzi media platformaları üzərindən sürətlə yayılan bu xəbərlər tamamilə yalan və iftiradır, və iki xalqın arasına nifaq salmaq məqsədi daşıyır. Bu cür yalanlar Türk millətinin əsl duyğularını və düşüncələrini əsla əks etdirmir.
Azərbaycan və Türkiyə arasındakı qardaşlıq diplomatik münasibətlərdən daha çox, xalqın ürəyində yaşayan ortaq ruhun, ortaq idealın və əbədi qardaşlıq duyğusunun təzahürüdür. Ancaq son vaxtlar bəzi məqsədli dezinformasiyalar bu müqəddəs qardaşlığa kölgə salmaq, iki millət arasında güvən çatışmazlığı yaratmaq niyyəti daşıyır. Bu kimi əsassız iddialar, nə Türk xalqının səmimi hisslərini, nə də Azərbaycan xalqına olan məhəbbətin həqiqi mahiyyətini ifadə edir. Əksinə, bu, fitnə yaratmaq, birlik və bərabərlik ruhunu zədələmək, əsrlər boyu formalaşmış qardaşlığa zərər vurmaq məqsədilə hazırlanmış məkrli və niyyətli kampaniyalardır.
Unudulmamalıdır ki, Azərbaycan və Türkiyənin qardaşlığı, müvəqqəti fırtınalarla sarsılacaq zəif bağ deyil. Bu qardaşlıq çoxsaylı sınaqlardan çıxmış, çətinlikləri birlikdə aşmış, “iki dövlət, bir millət” şüarı ilə tarixə yazılmış ölümsüz bir tale birliyidir.
Bu səbəblə, nə qədər fitnə yaradılmağa çalışılsa da, xalqın qəlbində yaşayan bu səmimi sevgi və qardaşlıq hissi, yalanlardan, iftiralardan və təxribatlardan qat-qat güclüdür. Türkiyənin məsul dövlət qurumları da, bu məsələdə əsasən xarici mərkəzlərdən qaynaqlanan və daxildə bəzi şər qüvvələrlə əlaqəli olan bu fitnə yuvaları ilə bağlı araşdırmalara və hüquqi tədbirlərə başlayıblar. Bu istiqamətdə lazımi tədbirlərin görüləcəyinə tam əminik.
