BAKI,VOA
Azərbaycanın diaspor təşkilatları Nyu-York merinə etiraz olaraq ABŞ Prezidenti Donald Trampa müraciət edib.
VOA xəbər verir ki, dünyanın müxtəlif ölkələrində yaşayan azərbaycanlılar milli maraqlar və tarixi həqiqətlərlə bağlı məsələlərdə hər zaman fəallıq nümayiş etdirərək prinsipial mövqe sərgiləyiblər.
ABŞ-nin Nyu York şəhərinin meri Zohran Kvame Mamdaninin "X" platformasında Azərbaycan əleyhinə səsləndirdiyi əsassız və qərəzli fikirlər diasporumuzun etirazı ilə qarşılanıb.
Kanadada fəaliyyət göstərən Hamilton Azərbaycan Cəmiyyəti, Kanada Azərbaycan Evi, "Vətən" Azərbaycan İncəsənət və Mədəniyyət Mərkəzi, "Az Media" Media qrupu, eləcə də İsraildəki Azərbaycan Mədəniyyət Mərkəzi və "Azİz" İsrail-Azərbaycan Beynəlxalq Assosiasiyası Nyu York merinin iddialarının beynəlxalq hüququn norma və prinsiplərinə zidd olduğunu vurğulayaraq ABŞ Prezidenti Donald Trampa məktub ünvanlayıblar.
Məktublarda Nyu York merinin Azərbaycan xalqına qarşı səsləndirdiyi ittihamlarla bağlı ciddi narahatlıq ifadə edilib. Qeyd olunub ki, ABŞ-nin Azərbaycan və Ermənistan arasında sülh sazişini dəstəklədiyi, münasibətlərin normallaşdırılması istiqamətində beynəlxalq tərəfdaşların vasitəçiliyi ilə mühüm addımların atıldığı bir dövrdə bu cür qərəzli yanaşmalar konstruktiv prosesə mənfi təsir göstərə bilər. Eyni zamanda vurğulanıb ki, Qarabağ bölgəsində yaşayan erməni əsilli əhaliyə reinteqrasiya çərçivəsində bərabər hüquqlar və təhlükəsizlik təminatları təklif olunub, onların sosial-iqtisadi həyata inteqrasiyası üçün konkret addımlar atılıb. Mülki şəxslərə qarşı etnik zəmində hər hansı zorakılıq faktı qeydə alınmayıb və bu istiqamətdə beynəlxalq hüququn prinsiplərinə uyğun davranış sərgilənib. Məktublarda, həmçinin Xocalı faciəsinin ağır nəticələri xatırladılaraq, bu hadisəyə hələ də beynəlxalq səviyyədə hüquqi-siyasi qiymətin verilmədiyi diqqətə çatdırılıb.
Məktublarda Donald Trampdan Azərbaycan xalqına qarşı səsləndirilən əsassız ittihamlarla bağlı məsələyə diqqət yetirilməsi xahiş olunub.
