Bakı, AzerPress:
Ukrayna Azərbaycanın və Azərbaycan xalqının böyük yardımını hiss edir.
AzerPress xəbər verir ki, bunu Ukraynanın Azərbaycandakı səfiri Vladislav Kanevskiy bu gün jurnalistlərə deyib.
"Ukrayna-Azərbaycan dostluğu tarixin sınağından keçib. Tariximizin ən çətin vaxtlarında bu ölkələr bir-birinə yardım edib. Biz bu gün də Azərbaycanın və Azərbaycan xalqının böyük yardımını hiss edirik. Bu həm humanitar yardım, həm də məhv edilmiş infrastrukturun yenidən qurulması üzrə yardımdır. Bugünədək Azərbaycan hökuməti tərəfindən bu məqsədlə 30 milyon dollardan çox vəsait ayrılıb.
Bu yaxında Azərbaycan Prezidenti İlham Əliyevin sərəncamı ilə 7,6 milyon dəyərində əlavə vəsait ayrıldığı üçün çox minnətdarıq. Bu məbləğ ilk növbədə bizim məhz enerji imkanlarımıza yardım üçün yönəlib. Çox minnətdarıq ki, ötən il qışın soyuq vaxtında mənim həmvətənlərim olan on minlərlə ukraynalı qışı Azərbaycanın yardımı hesabına keçirə bildi.
Daima Azərbaycan xalqının Ümummilli Lideri Heydər Əliyevin sözlərini xatırlayıram. O deyirdi ki, müstəqillik yolundan çətin yol yoxdur. Bu, həqiqətən də, belədir. Bizim dostluğumuz möhkəmlənir, strateji tərəfdaşlığımız inkişaf edir", - o deyib.
Qeyd edək ki, ölkəmiz tərəfindən Ukrayna xalqına humanitar yardım göstərilməsi məqsədilə nəzərdə tutulmuş elektrik avadanlıqlarının birinci hissəsi bu gün Sumqayıt Texnologiyalar Parkının ərazisindən yola salınıb. Azərbaycan Respublikasının Prezidenti İlham Əliyevin 2023-cü il 17 iyul tarixli sərəncamına uyğun olaraq Energetika Nazirliyinin tədarük etdiyi humanitar yükə 555 min metrdən çox elektrik kabelləri və naqilləri daxildir. 14 TIR-dan ibarət yük avtomobili karvanının daşıdığı humanitar məqsədli mallar Ukraynadakı mövcud vəziyyətlə əlaqədar zərər çəkmiş ərazilərin elektrik enerjisi ilə dayanıqlı təchizatının bərpasına dəstək üçün göndərilir. Ukrayna tərəfindən daxil olmuş müraciətlər əsasında təşkil olunan və ümumi dəyəri 7,6 milyon ABŞ dolları olan sözügedən yardımın növbəti hissələrinin yaxın müddət ərzində yola salınması planlaşdırılır.
Xatırladaq ki, Ukraynaya bundan əvvəl də ölkəmiz tərəfindən elektrik avadanlıqları ilə bağlı humanitar yardım göndərilib. Yaranmış böhranla əlaqədar Azərbaycan Respublikasının Ukraynaya göstərdiyi humanitar, o cümlədən bərpa və yenidənqurma işlərinə dəstək xarakterli yardımın ümumi məbləği artıq 33 milyon ABŞ dollarından çoxdur. Həyata keçirilən humanitar yardım fəaliyyətləri çərçivəsində müharibədən zərər çəkmiş, ailə üzvlərini itirmiş ümumilikdə 154 ukraynalı uşaq tibbi və sosial-psixoloji reabilitasiya məqsədilə ölkəmizə gətirilib. İrpen şəhərində hərbi əməliyyatlar nəticəsində dağılmış Zərifə Əliyeva adına “Linqvist” humanitar liseyi tam bərpa edilib, habelə həmin şəhərdə ciddi dağıntılara məruz qalmış bir sıra sosial təyinatlı obyektlərin Azərbaycan tərəfindən əsaslı bərpası ilə bağlı hazırda müvafiq işlər aparılmaqdadır.
