BAKI,AzerVoice
“Əlilliyi olan şəxslərə sosial dəstək” İctimai Birliyi Azərbaycan Respublikası Dövlət Turizm Agentliyinin maliyyə dəstəyi ilə Qəbələ rayonunun Duruca kəndində turizmin İnkişafına dəstək layihəsini uğurla icra edib.
AzerVoice xəbər verir ki, layihənin əsas məqsədi kənd turizminin inkişafını təşviq etmək, yerli icma üzvlərinin bu sahədə bilik və bacarıqlarını artırmaq və həssas qrupların iqtisadi fəallığa cəlb olunmasına dəstək göstərməkdən ibarət olub.
22–23 avqust 2025-ci il tarixlərində layihə çərçivəsində ictimai iaşə müəssisələrində çalışanlara və yerli sakinlərə “turizm və otelçilik, bələdçilik, xidmət və qonaqlama” mövzularında dörd təlim keçirilib. Təlimlərdə iştirakçılara kənd turizminin inkişaf perspektivləri, müasir turizm sektorunun tələbləri, qonaqpərvərlik standartları, etik davranış qaydaları, müştəri məmnuniyyətinin artırılması və turizm xidmətlərinin keyfiyyətinin yüksəldilməsi ilə bağlı ətraflı məlumat verilib. Proses, iştirakçıların peşəkar bacarıqlarının inkişaf etdirilməsinə və rayonun turizm potensialına töhfə verilməsinə yönəlib.
27–28 avqust 2025-ci il tarixlərində isə həssas qruplardan olan xanımlar üçün milli və müasir üslubda əl işləri hazırlamaq üzrə üç praktiki təlim təşkil olunub. Bu təlimlər iştirakçıların yaradıcılıq potensialını aşkara çıxarmaqla yanaşı, onların gələcəkdə kiçik biznes qurmaq imkanlarını genişləndirib və sosial inteqrasiyasını gücləndirib. Təlimlər Qəbələ Dövlət Peşə Təhsil Mərkəzində həyata keçirilib və 05.11.2025-ci il tarixində hazırlanan əl işlərinin satış-sərgisi təşkil olunub.
Layihənin mühüm istiqamətlərindən biri kimi 29 avqust 2025-ci ildən etibarən Duruca kəndində yerləşən ənənəvi söhbətgah və bulaq kompleksinin bərpası həyata keçirilib. Bərpa edilən söhbətgah həm yerli əhalinin toplaşması üçün rahat mühit, həm də turistlər üçün cəlbedici istirahət məkanı kimi istifadəyə verilib. Bu təşəbbüs kəndin turizm infrastrukturuna mühüm töhfə olmaqla yanaşı, yerli mədəniyyətin qorunmasına da xidmət edəcək.
“Əlilliyi olan şəxslərə sosial dəstək” İctimai Birliyinin həyata keçirdiyi layihələr, xüsusən də kənd icmalarında sosial-iqtisadi vəziyyətin yaxşılaşdırılmasına, məşğulluğun artırılmasına və inklüzivliyin təşviqinə yönəlib. Təşkilatın fəaliyyəti yerli icmalarda dayanıqlı inkişaf üçün mühüm sosial təsir yaradır.
