İsrailin hücumuna məruz qalmış Nasser xəstəxanasında Səudiyyə tərəfindən böyük layihə
Səudiyyə Ərəbistanı humanitar qurumu “Kral Salman Humanitar Yardım və Xeyriyyə Mərkəzi” Qəzza zolağının cənubunda, Xan Yunisdə yerləşən Nasser Tibb Kompleksində mühüm layihə həyata keçirib. Layihə Ümumdünya Səhiyyə Təşkilatı (ÜST) ilə əməkdaşlıq çərçivəsində reallaşdırılıb. Yeni layihə çərçivəsində ən yüksək standartlara cavab verən tibbi anbar yaradılıb və ora böyük həcmdə əsas tibbi ləvazimat göndərilərək müxtəlif şöbələrə paylanıb. Bundan başqa, böyrək çatışmazlığından əziyyət çəkən və mütəmadi dializ müalicəsinə ehtiyacı olan xəstələr üçün kompleksdəki dializ şöbəsi ən müasir avadanlıq və tibbi cihazlarla təchiz olunub. Bu addım həm xəstələrin həyatına ümid bəxş edib, həm də kompleksin müasir müalicə xidmətləri göstərmək imkanlarını əhəmiyyətli dərəcədə artırıb.
Vatikan Dövlət katibi Qəzza və Ukrayandakı son vəiyyətlə bağlı açıqlama verib
Neapolda keçirilən 75-ci Milli Liturgiya Həftəsinin açılışında çıxış edən Vatikan Dövlət katibi Kardinal Pietro Parolin, Qəzzada və Ukraynada davam edən münaqişələrin yaratdığı insan faciəsinə diqqət çəkib, “bütün ümidsizliyə rəğmən ümid etməyin vacibliyini” vurğulayıb. Kardinal Parolin Qəzzadakı vəziyyəti pisləyərək bildirib: “Qəzzada baş verənlərə görə dəhşətə gəlirik, hadisələri pisləməkdə yekdil fikir var.” O, xüsusilə Xan Yunisdəki Nasser Xəstəxanasına edilən İsrail hücumuna toxunub. Həmin hücum nəticəsində aralarında beş jurnalistin də olduğu 20 nəfərin həlak olduğunu xatırladan kardinal, bunun “heç bir məna daşımadığını” vurğulayıb. O əlavə edib ki, Qəzzada vəziyyət getdikcə daha da çətinləşir, humanitar baxımdan isə təhlükəli həddə çatır: “Həll üçün heç bir yol görünmür, nəticələrini isə hər gün görürük.”
