Dünyaya yayılan üsyan və azadlıq -Rai musiqisi
Əlcəzairin qərbində, xüsusilə Oran (Vəhran) şəhərində yaranan Rai (Raï) musiqisi, sadəcə bir musiqi janrı deyil, eyni zamanda Şimali Afrikanın sosial, siyasi və mədəni tarixini özündə əks etdirən güclü bir fəlsəfə və cəmiyyətin güzgüsüdür. Ərəb dilində “rəy“, “fikir” və ya “baxış bucağı” mənasını verən “Rai”, onilliklər ərzində yoxsulların, gənclərin və cəmiyyətin basqı altında qalan təbəqəsinin öz səsini dünyaya çatdırdığı əsas tribunaya çevrilmişdir.
Rok, pank və rai musiqisinin üsyankar siması - Rəşid Taha kimdir?
Rəşid Taha (18 sentyabr 1958 – 12 sentyabr 2018) — Fransada məskunlaşmış, musiqidəki cəsarətli eksperimentləri və aktivist fəaliyyəti ilə tanınan əlcəzairli sənətçidir. Onun yaradıcılığı rok, elektronika, pank və rai kimi fərqli üslubların sintezindən formalaşmışdır. Taha 18 sentyabr 1958-ci ildə Əlcəzairin Maskara vilayətinin Siq şəhərində anadan olub (digər mənbələrdə doğum yeri kimi Oran şəhəri göstərilir). Oran şəhəri “rai” musiqisinin beşiyi hesab olunur. Tahanın doğulduğu il həm də Əlcəzairin Fransa müstəmləkəçiliyinə qarşı müstəqillik mübarizəsinin ən qızğın dövrünə təsadüf edir. O, 1960-cı illərdə Əlcəzairin “şaabi” adlanan küçə üslublu musiqilərini və Məğrib bölgəsinin zəngin melodiyalarını dinləyərək böyümüşdür.
