Bakı, AzerVoice
Türkiyənin "Radyo ve Televizyon Üst Kurulu" (RTÜK) yeni media platformalarında küçə sorğuları və ya vətəndaşın rəyi kimi təqdim edilən fəaliyyətlərə nəzarət ediləcəyini bildirib.
AzerVoice xəbər verir ki, RTÜK-in rəhbəri Ebubekr Şahin sosial media hesabından bu barədə açıqlama verib.
Açıqlamada televiziya kanallarında və sosial media hesablarında "küçə sorğusu" və "vətəndaş rəyi" adı altında təqdim edilən yayımların ictimai rəyi yanlış yönləndirdiyi, onu manipulyasiya etdiyi bildirilib. O həmçinin, bunun mətbuatın ümumbəşəri peşəkarlıq prinsiplərinin və mətbuatın etik dəyərlərinin pozulmasını təşkil edəcək səviyyələrə çatdığını əlavə edib.
İctimaiyyəti yönləndirmək məqsədilə "küçənin səsi" adı altında edilən yayınların ancaq yayımlayanın fikrinə dəstək verdiyini ifadə edən Şahin bunlarıda əlavə edib,“Yalnız nəzərdə tutulan mesaja uyğun rəylərin yer aldığı müsahibələrdə vətəndaşların fikirləri sanki geniş ictimaiyyətin səsi və ya cəmiyyətin böyük bir hissəsinin rəyi kimi əks etdirilir. Bu isə obyektivlikdən uzaq, məqsədyönlü yönləndirici tərəfi ilə dezinformasiyaya yol açır. Bu cür aldadıcı müsahibə üsulları kütlələrə şüurlu şəkildə təsir etmək məqsədiylə istifadə olunur”, -deyə qeyd edib.
Xüsusilə, yeni media platformalarında bu cür fəaliyyətlər və paylaşımlara vizual yayım sahəsində fəaliyyət göstərən dövlət qurumu RTÜK tərəfindən nəzarət edilir. Kütlələri sosioloji qarşıdurmalara sürükləyən bu tip yayım fəaliyyətləri ilə bağlı RTÜK vizual yayım prinsipləri çərçivəsində lazımi işləri həyata keçirməyə davam etməkdədir.
