BAKI, AzerVoice
Türkiyə Prezident Administrasiyasının Kommunikasiya İdarəsinin rəhbəri Fəxrəddin Altun, Qəzzaya humanitar yardım çatdırmaq üçün yola çıxan və içərisində 12 insan hüquqları müdafiəçisinin olduğu “Madleen” gəmisinə edilən hücumla bağlı İsrailə sərt reaksiya verib.
AzerVoice xəbər verir ki, Altun sosial media hesabında etdiyi paylaşımda bildirib ki, bu hücum təkcə Fələstinin deyil, bütün bəşəriyyətin problemidir.
Altunun paylaşımında aşağıdakı ifadələr yer alıb:
“İsrailin Qəzzaya humanitar yardım çatdırmaq məqsədilə yola çıxan mülki ‘Madleen’ gəmisinə qarşı hücumu, beynəlxalq hüququn və insan hüquqlarının açıq-aşkar pozulmasıdır. Bu alçaq hücumu ən sərt şəkildə qınayırıq.
Sionist İsrail rəhbərliyi, ən əsas humanitar yardımların belə Qəzzaya çatmasına dözümsüz yanaşdığını bir daha göstərmişdir. Qəzzada aylardır davam edən sistematik dağıntılar və qətliamlar, heç bir əxlaqi və hüquqi ölçü tanımayan bir terror dövlətinin məhsuludur. Qadınların, uşaqların və yaşlıların hədəf alındığı bu düşüncəsiz hücumlar artıq təkcə Fələstinin deyil, bütün insanlığın problemidir.
İsrail rəhbərliyi 20 aydan artıqdır ki, həyata keçirdiyi vəhşiliklə regional sülhü təhdid edən, qlobal təhlükəsizliyi riskə atan bir ‘qarışdırıcıya’ çevrilmişdir. Bu reallığı görməməzliyə vuran, susan və ya reaksiya verməyən hər bir mövqe bu cinayətdə şərik olmaq deməkdir.
Türkiyə olaraq bu vəhşiliyin dayandırılması, Qəzzaya humanitar yardımların fasiləsiz çatdırılması və bölgədə ədalətli sülhün bərqərar olunması üçün çağırışımızı bir daha təkrar edirik. Beynəlxalq ictimaiyyəti və bütün bəşəriyyəti bu fəryada səs verməyə və konkret addımlar atmağa dəvət edirik.”
Qeyd edək ki, İsrail hərbçiləri, Qəzzaya yardım göndərmək məqsədilə yola çıxan "Madleen" adlı gəmini ələ keçirib və gəmidəki 12 fəalı, o cümlədən Qreta Tanberqi həbs edərək gəmini Aşdod limanına gətirib.
İsrailin qanunsuz blokadasına qarşı açıq etiraz olaraq Fələstin tərəfdarı Azadlıq Donanması Koalisiyası (FFC) tərəfindən təşkil edilib.
Azadlıq Donanması Koalisiyası, Telegram üzərindən "SOS! Madleen gəmisindəki könüllülər İsrail qüvvələri tərəfindən oğurlanıb" mesajını yayımlayaraq, gəminin ələ keçirildikdən sonra əlaqənin kəsildiyini bildirdi.
Canlı yayımlanan görüntülərdə, İsrail gəmilərinin "Madleen" gəmisini əhatə etdiyi və fəallara əllərini havaya qaldırmağı əmr etdiyi görünür. Gəmi, Qəzzaya humanitar yardım göndərməyi və oradakı böhrana diqqət çəkməyi hədəfləyirdi.
Həmçinin, HƏMAS hərəkatı, beynəlxalq ictimaiyyəti İsrailin yardım gəmisinə qarşı amansız hücumunu pisləməyə çağırıb.
Birləşmiş Millətlər Təşkilatının Fələstindəki insan hüquqları üzrə xüsusi müşavirəsi Francesca Albanese, gəminin işğalçı qüvvələr tərəfindən ələ keçirilməsindən sonra, Britaniya hökumətinə dərhal tədbir görməyi və gəmini və sərnişinlərini azad etməyə çalışmasını tövsiyə edib.
Albanese, Azadlıq Donanması Koalisiyasının əməliyyatını dəstəkləyərək, digər gəmilərə Qəzza blokadasına qarşı mübarizə aparmalarını çağırıb.
