BAKI, AzerVoice
Türkiyədə keçirilən miqrasiya əməliyyatlarında 32 miqrant qaçaqçısı və 572 qeyri-qanuni miqrant tutulub.
AzerVoice xəbər verir ki, Türkiyənin daxili işlər naziri Ali Yerlikaya ölkə üzrə aparılan genişmiqyaslı miqrasiya yoxlamaları nəticəsində 6-sı xarici olmaqla 32 miqrant qaçaqçılığı təşkilatçısının və 572 qeyri-qanuni miqrantın saxlanıldığını açıqlayıb.
Nazirin sözlərinə görə, ümumilikdə 27 min 108 nəfərlik heyətin iştirakı ilə 5 min 673 yerdə — o cümlədən 4 min 329 tərk edilmiş bina, 8 min 064 ictimai obyekt, 446 terminal və 5 min 551 digər ərazi yoxlanılıb. Yoxlamalar zamanı 394 min 537 nəfərin şəxsiyyəti müəyyən edilib.
Miqrant qaçaqçılığı ilə mübarizə çərçivəsində aparılan əməliyyatlar zamanı insan hüquq və azadlıqlarına hörmət prinsiplərinə riayət edildiyi, təhlükəsizlik və asayişin təminində hüquqi çərçivədən kənara çıxılmadığı vurğulanıb.
Nazir Yerlikaya yoxlamaların təşkilində iştirak edən qubernatorlar, Miqrasiya İdarəsi rəhbərliyi, Təhlükəsizlik Baş İdarəsinin Miqrant Qaçaqçılığı və Sərhəd Qapıları ilə Mübarizə Şöbəsi, jandarma, sahil mühafizəsi və digər təhlükəsizlik qüvvələrinə təşəkkür edib.
Qeyd edək ki, Türkiyə son illərdə qeyri-qanuni miqrasiyaya qarşı mübarizəni gücləndirib və bu istiqamətdə regional və beynəlxalq əməkdaşlığı da artırır.
