BAKI, AzerVoice, Nailə Babazadə
Türkiyə Milli Müdafiə Nazirliyi (MSB) mənbələri, Türkiyənin Qəzzada yaradılacaq beynəlxalq müşahidə qüvvəsində yer alıb-almayacağı ilə bağlı açıqlama verib. Nazirlik, Türk Silahlı Qüvvələrinin barışın bərqərar olunması və qorunmasında böyük təcrübəyə sahib olduğunu və üzərinə düşəcək hər cür vəzifəyə hazır olduğunu bildirib.
AzerVoice xəbər verir ki, Prezident Rəcəb Tayyib Ərdoğanın, HƏMAS ilə İsrail arasında əldə edilən atəşkəs razılaşmasının yerində tətbiqini izləyəcək beynəlxalq qüvvədə Türkiyənin də iştirak edəcəyini açıqlamasının ardından, Ankara hökumətinin bu prosesə necə töhfə verəcəyi diqqət mərkəzinə çevrilib.
Türkiyə Milli Müdafiə Nazirliyi tərəfindən verilən açıqlamada, Türk Silahlı Qüvvələrinin (TSQ) indiyədək dünyanın müxtəlif bölgələrində çoxsaylı beynəlxalq missiyalarda uğurla iştirak etdiyi vurğulanıb.
"Türk Silahlı Qüvvələri bu günə qədər beynəlxalq sülh və təhlükəsizliyin qorunması məqsədilə müxtəlif qurumlar tərəfindən təşkil olunan çoxsaylı missiyalarda iştirak etmiş, peşəkarlığı və ədalətli mövqeyi ilə bütün tərəflərin rəğbətini qazanmışdır." - deyə açıqlamada vurğulanıb.
Qeyd edək ki, Türkiyə tərəfi, atəşkəsin möhkəmləndirilməsi və bölgədə sabitliyin qorunması istiqamətində beynəlxalq əməkdaşlığa açıq olduğunu dəfələrlə bəyan edib.
