BAKI, AzerVoice, Fərid Mikayılov
Türkiyənin müdafiə sənayesində strateji əhəmiyyət daşıyan Bayraktar KIZILELMA pilotsuz uçuş aparatı 2026-cı ildə Türkiyə Silahlı Qüvvələrinin istifadəsinə veriləcək.
AzerVoice xəbər verir ki, layihə çərçivəsində aparılan sınaqlara artıq döyüş sursatlarının atış testi də əlavə olunub.
Mütəxəssislərin fikrincə, KIZILELMA-nın xidmətdə tətbiqi Türkiyə Hərbi Hava Qüvvələrinin F-16 və F-4 tipli döyüş təyyarələrinin əməliyyat yükünü azaldacaq.
Müdafiə sənayesi üzrə ekspert Yusif Akbaba bildirib ki, bəzi tapşırıqlarda sursatın daha yüksəkdən və sürətli şəkildə buraxılması tələb olunur.
“Belə hallarda indiyə qədər yalnız pilotlu təyyarələrdən istifadə edilirdi. Lakin KIZILELMA artıq bu funksiyaları da yerinə yetirə biləcək” – deyə o vurğulayıb.
Ekspertin sözlərinə görə, insansız sistemlərin tətbiqi həm əməliyyat çevikliyini artıracaq, həm də texniki xidmət və ehtiyat hissələrinin xərclərini azaldacaq.
Yusif Akbaba qeyd edib ki, Türkiyə hava-yer tipli sursatların çeşidinə görə dünyada ilk üç ölkə arasında yer alır. Lakin xarici istehsal təyyarələrə yerli sursatların uyğunlaşdırılması həm icazə prosedurlarına, həm də yüksək xərc və uzunmüddətli texniki proseslərə bağlıdır.
“KIZILELMA bu məhdudiyyəti aradan qaldıracaq. Təyyarə də, sursat da yerli istehsaldır. Buna görə də uyğunlaşdırma prosesi qısa zamanda və xeyli az büdcə ilə həyata keçiriləcək” – deyə ekspert bildirib.
Bu yenilik sayəsində Türkiyə geniş çeşiddə milli sursatları istədiyi kimi tətbiq edə biləcək və xarici əməliyyat məhdudiyyətlərindən tam azad olacaq.
Akbaba əlavə edib ki, KIZILELMA ilə ANKA-3 layihələri bir-birini tamamlayan sistemlərdir. Onların birgə istifadəsi müasir əməliyyat konsepsiyasını formalaşdıracaq.
KIZILELMA-nın milli sursatlarla tam uyğunluğu və daxili bölmədən atəş açma bacarığı Türkiyə müdafiə sənayesində yeni mərhələnin əsasını qoyur. Mütəxəssislər hesab edir ki, bu yenilik əməliyyat azadlığını artıracaq, xərcləri azaldacaq və Türkiyəni gələcəyin hava qüvvələri modelində aparıcı ölkələrdən birinə çevirəcək.
