BAKI, AzerVoice, Orxan Qədirzadə
Türkiyənin xarici işlər naziri Hakan Fidan Brüsseldə NATO Xarici İşlər Nazirləri Toplantısından sonra jurnalistlərə açıqlama verərək Rusiya–Ukrayna danışıqları, Qara dənizdə gəmilərə hücumlar və Avropanın gələcək təhlükəsizlik arxitekturasına dair mühüm mesajlar səsləndirib.
AzerVoice-un məlumatına görə Fidan açıqlama zamanı bildirib ki, Türkiyə Qara dənizdə ölkənin müstəsna iqtisadi zonasındakı gəmilərə edilən hücumları ciddi narahatlıqla izləyir. Nazir hücumların həm naviqasiyaya, həm də ticarət axınına təsir etdiyini vurğulayaraq, “Müharibənin sərhədlərinin genişlənməsi narahatedici haldır.” deyib.
Nazir Rusiya–Ukrayna sülh prosesində ümidini qoruduğunu qeyd edib. Fidan danışıqların davam etməsinin və tərəflərin danışıqlardan ayrılmamasının vacibliyini vurğulayıb.
O, ABŞ Prezidenti Donald Trampın xüsusi nümayəndəsi Stiv Vitkoffun vasitəçi kimi “əhəmiyyətli rol oynayacağını” və bu proses üçün kifayət qədər təcrübəyə sahib olduğunu bildirib.
Fidan NATO toplantılarında Avropada müharibədən sonra qurulacaq yeni sistemin əsas müzakirə mövzusu olduğunu vurğulayıb.
“Danışıqlar yalnız sülhü deyil, Avropanın gələcək təhlükəsizlik modelini də müəyyən edəcək. Ona görə bütün tərəflər mümkün razılaşmaya həddən artıq əhəmiyyət verir.” - nazir deyib.
Nazir qeyd edib ki, tərəflər yalnız bu günün deyil, gələcək nəsillərin də təhlükəsizliyini nəzərə alaraq risk və qazanc hesablamaları aparırlar.
Fidan açıqlamasında Avropa İttifaqı ilə ayrı-ayrı ölkələr səviyyəsində münasibətlərin yaxşı irəlilədiyini, lakin tamhüquqlu əməkdaşlığın qarşısında institusional maneələrin qaldığını deyib.
“Kiminlə danışsam, hamı Cənubi Kiprdən şikayət edir. 400 milyondan çox insanın gələcəyinə təsir edən proses sinerji bir qrup tərəfindən bloklanır,” — deyə o bildirib.
Nazir qeyd edib ki, Aİ-da qərarların bəzən yekdillik prinsipi ilə qəbul olunması sui-istifadə edilir və bu da strateji prosesləri ləngidir.
Fidan vurğulayıb ki, Türkiyə diplomatiyada heç kimə üstünlük tanımadan, eyni zamanda qarşı tərəfə əlavə imkan yaratmadan öz yolunu davam etdirir.
