BAKI,AzerVoice, Orxan Qədirzadə
NATO-nun Avropadakı Birgə Silahlı Qüvvələrinin Ali Baş Komandanı (SACEUR) general-polkovnik Aleksus Qrinkeviç Türkiyənin Alyans üçün strateji əhəmiyyətini vurğulayaraq bildirib ki, təşkilatın ən bacarıqlı hərbi liderlərindən bəziləri məhz Türkiyə hərbiçiləridir.
AzerVoice xəbər verir ki, general bu fikirləri Belçikanın Mons şəhərində yerləşən NATO-nun SHAPE qərargahında “Anadolu” agentliyinə müsahibəsi zamanı səsləndirib. Onun sözlərinə görə, NATO və Avropa İttifaqı arasında əməkdaşlıq sabit şəkildə davam edir və Alyans birgə güclərin daha səmərəli koordinasiyasına çalışır.
Qrinkeviç qeyd edib ki, NATO-nun hərbi komandanlıq strukturu aydın və funksionaldır, ittifaq isə Aİ ilə əməkdaşlıq çərçivəsində zəruri texnoloji imkanlar barədə tövsiyələr verir.
General bildirib ki, Alyansda yüksək etimad qazanan rəhbərlər arasında türkiyəli komandirlərin xüsusi yeri var. O, hazırda Kosovodakı NATO qüvvələrinin komandanının fəaliyyətinə böyük etimad göstərildiyini vurğulayıb.
Qrinkeviçin sözlərinə görə, Avropada hibrid hücumların sayı artır və bu prosesin davam edəcəyi istisna olunmur. O deyib ki, bəzi hücumlar təsadüfi xarakter daşısa da, digərləri məqsədli şəkildə həyata keçirilir.
“Bu fəaliyyətlərin bir hissəsinin arxasında Rusiyanın dayandığı məlumdur. Cəmiyyət də bunun fərqində olmalıdır.”- o, deyib.
General bildirib ki, vəziyyət NATO üçün idarəolunandır və bu təhdidlər Alyansın birlik və konsolidasiyasını zəiflətmir.
O bildirib ki, NATO hibrid hücumlara qarşı daha fəal tədbirlər görməyi müzakirə edir, lakin hər zaman müdafiə xarakterli ittifaq olaraq qalacaq.
Rusiyanın mümkün aqressiyası barədə suala cavab verən Qrinkeviç “Rusiya bizi hər gün sınağa çəkir. Məncə, biz bu çağırışlarla hər gün üz-üzəyik.”-deyə bildirib.
General əlavə edib ki, hazırda ən böyük risk NATO-ya qarşı olan qüvvələrin sıx əməkdaşlığından qaynaqlanır. Onun sözlərinə görə, Çin Rusiyanın Ukraynadakı müharibəsini maliyyələşdirir, Şimali Koreya canlı qüvvə və avadanlıq göndərir, İran isə texnologiya və hərbi vasitələr təmin edir.
