BAKI,AzerVoice, Fərid Mikayılov
Türkiyənin Ticarət naziri Ömər Bolat, ABŞ-da çox məhsuldar görüşlər keçirdiklərini və iki ölkə arasındakı ticarət həcmini 100 milyard dollar hədəfinə çatdırmaq üçün işlərin davam edəcəyini açıqlayıb.
AzerVoice xəbər verir ki, Bolat, ABŞ-da aparılan yüksək səviyyəli görüşlər və ikili iqtisadi-ticarət əlaqələrinin inkişaf etdirilməsi məqsədilə aparılan danışıqlar açıqlama verib.
O bildirib ki, Rəcəb Tayyib Ərdoğan ilə ABŞ Prezidenti Donald Tramp arasında sentyabr ayında baş tutmuş görüş iki ölkə münasibətlərində mühüm dönüş nöqtəsi olub. Bu görüşün siyasi əlaqələr və regional böhranların həllində Türkiyə və ABŞ arasındakı əməkdaşlığa sürət qazandırdığını vurğulayıb.
"İki lider daha əvvəl də iki ölkə arasında ticarəti 100 milyard dollara çıxarmaq hədəfini açıqlamışdı. Biz isə ticarət nazirləri olaraq bunun həyata keçirilmə yol xəritəsini işləməliyik" – deyə Bolat qeyd edib.
Bolat bildirib ki, Vaşinqtondakı səfəri çərçivəsində ilk olaraq ABŞ Ticarət Nümayəndəsi Jamieson Greer və heyəti ilə 1,5 saatlıq geniş görüş keçirilib. Daha sonra ABŞ Ticarət Palatasının ev sahibliyi etdiyi toplantıda, Türkiyədə yatırımları olan təxminən 20 böyük Amerikan şirkətinin rəhbərləri ilə işgüzar müzakirələr aparılıb. Səfərin son mərhələsində isə ABŞ Ticarət Naziri Howard Lutnick ilə ətraflı görüş olub.
"İki ölkə heyətləri arasında texniki səviyyədə məsələlər işlənəcək. Türkiyə ilə ABŞ arasında keçən il 34 milyard dollar, bu il isə 38 milyard dollar olan ticarəti, gələn il rahatlıqla 40 milyard dolların üzərinə çıxarıb orta və uzun müddətdə 100 milyard dollar hədəfinə çatdırmaq üçün işlər davam edəcək"- deyə o bildirib.
Görüşlərdə ticarət qaydaları, qanunvericilik, Türkiyəyə daha çox Amerikan sərmayəsinin cəlb edilməsi və gözləntilər müzakirə olunub. Bolat bildirib ki, ABŞ-ın 2 mindən çox şirkəti Türkiyədə 15,5 milyard dollardan çox sərmayə qoyub.
O həmçinin, Türkiyə və ABŞ arasında son illərdə rəqəmsal xidmətlər, enerji, aviasiya və müdafiə sənayesi sahələrində artan sərmayə və əməkdaşlıq imkanlarına toxunub.
Google şirkətinin Turkcell ilə birlikdə 3 milyard dollarlıq sərmayə planını buna nümunə göstərən Bolat, digər şirkətlərin də oxşar planları olduğunu bildirib.
O qeyd edib ki, son 22 ildə Türkiyəyə 280 milyard dollar birbaşa sərmayə daxil olub, bu ilin ilk 9 ayında isə birbaşa xarici sərmayə 45 faiz artaraq 11,4 milyard dollara çatıb.
O həmçinin enerji, hava yolu nəqliyyatı, müdafiə sənayesi, yenilənəbilən enerji və rəqəmsal xidmətlər sahəsində əməkdaşlıq imkanlarının böyük olduğunu vurğulayıb.
