BAKI,AzerVoice, Fərid Mikayılov
Türkiyədə 6 şəhərdə dələduzluq və sələmçilik fəaliyyəti ilə məşğul olan 9 ayrı mütəşəkkil cinayət dəstəsinə qarşı son iki həftə ərzində genişmiqyaslı əməliyyatlar həyata keçirilib.
AzerVoice xəbər verir ki, bu barədə Türkiyənin Daxili İşlər Nazir Ali Yerlikaya X sosial media hesabından paylaşım edib.
Əməliyyatlar nəticəsində son iki ildə bank hesablarında 2 milyard 408 milyon lirəlik əməliyyat həcmi müəyyən edilən 61 şübhəli saxlanılıb. Hüquq-mühafizə orqanlarının müdaxiləsi ilə bu cinayət qruplarının törədə biləcəyi sələmçilik, dələduzluq və oğurluq kimi əməllərdən vətəndaşların zərər görməsinin qarşısı alınıb.
Saxlanılan şəxslərdən, 46 nəfər barəsində həbs qətimkan tədbiri seçilib, 15 nəfər haqqında isə məhkəmə nəzarəti tədbirləri tətbiq edilib.
Əməliyyatlar Respublika Baş Prokurorluqları ilə Kibercinayətlərlə Mübarizə İdarələrinin koordinasiyası əsasında, İl Jandarma Komandanlıqları tərəfindən həyata keçirilib.
Araşdırmalar zamanı şübhəlilərin müxtəlif bölgələrdə aşağıdakı cinayət əməllərini törətdikləri müəyyən olunub:
- Qaziantepdə saxta “investisiya məsləhətçiliyi” elanları ilə vətəndaşlardan pul tələb edərək dələduzluq etdikləri,
- Muğlada sosial şəbəkələr vasitəsilə əlaqə yaradaraq saxta investisiya saytlarına yönləndirməklə 244 vətəndaşı aldatdıqları,
- Balıkesirdə mütəşəkkil şəkildə narkotik ticarəti ilə məşğul olduqları və sələmçilik fəaliyyəti apardıqları,
- Diyarbəkirdə təzyiq, zorakılıq, hədə-qorxu və təhdid yolu ilə torpaq sahələrinin sənədlərini ələ keçirməyə cəhd göstərdikləri,
- Zonguldakda sosial media üzərindən saxta “imtahansız sürücülük vəsiqəsi” elanları ilə dələduzluq etdikləri,
- Sivasda isə sələmçilik fəaliyyəti ilə məşğul olduqları müəyyən edilib.
Faktlarla bağlı prokurorluqlar tərəfindən cinayət işi başlanılıb, istintaq tədbirləri davam etdirilir.
