BAKI, AzerVoice, Nailə Babazadə
Ərdoğan yeni ilin ilk günündə Fələstindəki qırğınlara etiraz məqsədilə Qalata körpüsündə keçirilən mitinqə toxunaraq bildirib ki, bu tədbir Fələstinin tək olmadığını göstərib.
AzerVoice xəbər verir ki,Türkiyə Prezidenti Rəcəb Tayyib Ərdoğan İstanbulda cümə namazından sonra jurnalistlərin suallarını cavablandırıb.
“Yeni ilə daxil olarkən Qalata körpüsündə tarixi bir ana birlikdə şahidlik etdik. Bu onu göstərir ki, Fələstin tək deyil. Fələstin hər zaman bizim canımız-ciyərimizdir və İsrailin bu düşmənçiliyi cavabsız qalmayacaq”. - deyə Ərdoğan qeyd edib.
Türkiyənin Qəzza və Fələstini heç vaxt tək buraxmadığını vurğulayan Prezident deyib ki, bundan sonra da Ankara İslam dünyası ilə birlikdə Fələstin xalqının yanında olacaq.
“Bundan sonra nə Qəzza, nə də Fələstin tək qalacaq. Türkiyə olaraq, İslam dünyası olaraq Fələstin və Qəzzənin yanında duraraq güc birliyimizi davam etdirəcəyik. 2026-cı ilə daha güclü şəkildə daxil oluruq. Xüsusilə Netanyahunun etdikləri cavabsız qalmayacaq. O, 7-dən 70-ə qədər çoxlu məzlumun ahını alıb. Bu körpələrin ahı onun yanına qalmayacaq”, – deyə Ərdoğan bildirib.
O, televiziya ekranlarında çadır şəraitində, külək, yağış və palçıq içində yaşayan uşaqların görüntülərinə diqqət çəkərək bu vəziyyətin cavabsız qalmayacağını vurğulayıb.
Prezident Ərdoğan Türkiyənin humanitar yardım göstərmək istədiyini, lakin buna icazə verilmədiyini də qeyd edib:
“Biz konteyner göndərmək istəyirik, amma icazə verilmir. Əlimizdə konteynerlər var. Onlarla fələstinli və qazəli qardaşlarımızı çadırlarda yaşamaqdan xilas edə bilərdik, lakin buna imkan verilmir. Amma gec-tez, inşallah, o məzlumları bu çətinlikdən xilas edəcəyik”.
