BAKI, AzerVoice, Nailə Babazadə
Ankarada mənfəət əldə etmək məqsədi güdən cinayətkar qruplaşmaya qarşı keçirilən əməliyyatda saxlanılan 23 şübhəli barəsində həbs qətimkan tədbiri seçilib.
AzerVoice xəbər verir ki, Ankara Respublika Baş Prokurorluğunun koordinasiyası ilə aparılan istintaq çərçivəsində, Ankara İl Polis İdarəsinin Mütəşəkkil Cinayətkarlıqla Mübarizə Şöbəsi tərəfindən İ.Ş.-nin liderlik etdiyi cinayətkar dəstəyə qarşı əməliyyat keçirilib.
Polis qrupları; "nitelikli yağma" (reketlik), narkotik və stimullaşdırıcı maddələrin ticarəti, şəxsi istifadə üçün narkotik saxlama, hədə-qorxu gəlmə, qanunsuz silah gəzdirmə və saxlama, silah və sursat ticarəti, cinayət sübutlarını məhv etmə, gizlətmə və ya dəyişdirmə, məhkəmə prosesinə təsir göstərməyə cəhd, həmçinin iş və çalışma azadlığına mane olma cinayətlərini törətdiyi müəyyən edilən 23 şübhəlini saxlayıb.
Şübhəlilərin yaşayış yerlərində və iş yerlərində eyni vaxtda aparılan axtarışlar zamanı 1680 ədəd narkotik həb, 3 tapança, 7 qram nəşə, 3 sandıqça, 70 patron, ballistik jilet, 125 ədəd sintetik dərman preparatı və cihaz axtarışında istifadə olunan detektor ələ keçirilib.
Polis idarəsindəki əməliyyatlardan sonra həbs tələbi ilə Ankara Respublika Baş Prokurorluğuna göndərilən 23 şübhəli, çıxarıldıqları Növbətçi Sulh Cəza Məhkəməsi tərəfindən həbs olunaraq həbsxanaya göndərilib.
