BAKI,VOA,Yusif Şərifzadə

Türkiyə Prezidenti Rəcəb Tayyib Ərdoğan bildirib ki, Fələstin məsələsi Yaxın Şərqdə gərginliyin əsas səbəblərindən biridir və bölgədə davamlı sülh yalnız iki dövlətli həll modeli ilə mümkündür.

VOA xəbər verir ki, Rəcəb Tayyib Ərdoğan bu fikirləri İstanbulda keçirilən NATO toplantısında çıxışı zamanı səsləndirib.

Türkiyə Prezidenti bildirib ki, İsrailin Fələstin torpaqlarında məskunlaşma siyasəti dayandırılmadan bölgədə uzunmüddətli sülhə nail olmaq mümkün deyil.

Ərdoğan vurğulayıb ki, Yaxın Şərqdə sabitliyin təmin edilməsi üçün Fələstin məsələsinin beynəlxalq hüquq çərçivəsində həll olunması vacibdir.

Türkiyə Prezidenti son dövrlərdə Qəzza zolağında və işğal altında olan İordan çayının qərb sahilində həyata keçirilən hərbi əməliyyatlarla bağlı İsraili sərt tənqid etməyə davam edir.

Xatırladaq ki, 2024-cü ildə Ərdoğanın Qəzzaya qarşı hərbi əməliyyatların dayandırılması məqsədilə Türkiyənin hərbi müdaxilə edə biləcəyi barədə bəyanatından sonra Ankara ilə Təl-Əviv arasında kəskin siyasi qarşıdurma yaranmışdı.