BAKI,VOA
Türkiyənin daxili işlər naziri Mustafa Çiftçi Suriyanın paytaxtı Dəməşqdə yerləşən Tişrin Sarayında bu ölkənin daxili işlər naziri Ənəs Həttab ilə görüş keçirib.
VOA xəbər verir ki, görüş zamanı Türkiyə ilə Suriya arasında təhlükəsizlik, ictimai asayişin təmin olunması və institusional potensialın gücləndirilməsi istiqamətində əməkdaşlıq məsələləri müzakirə olunub.
Tərəflər yol hərəkətinə elektron nəzarət sistemlərinin qurulması, avtomobil nömrələrinin və barmaq izlərinin tanınması texnologiyalarının tətbiqinin genişləndirilməsi, pasport və şəxsiyyət vəsiqələrinin hazırlanması prosesinin təkmilləşdirilməsi, eləcə də təhlükəsizlik avadanlıqları sahəsində əməkdaşlıq imkanlarını nəzərdən keçiriblər.
Bununla yanaşı, 112 təcili çağrı və təcili tibbi yardım şəbəkəsinin yaradılması, narkotik vasitələrin qanunsuz dövriyyəsinə qarşı mübarizə sahəsində təcrübə mübadiləsi və suriyalı polis əməkdaşlarının hazırlanması məsələləri də müzakirə edilib.
Görüşdə Türkiyə tərəfdən Jandarma Baş Komandanı ordu generalı Əli Çardakçı, Polis Baş Direktoru Əli Fidan, Miqrasiya İdarəsinin rəhbəri Məhəmməd Səlami Yazıcı və AFAD-ın rəhbəri Əli Həmzə Pehlivan iştirak ediblər.
Suriya tərəfini isə daxili işlər nazirinin müavini Əbdülqadir Tahan, inzibati və maliyyə işləri üzrə nazir müavini Basim əl-Mənsur, insan resursları üzrə nazir müavini Hüsam Fəttuh, Miqrasiya və Pasport İdarəsinin rəhbəri Osman Hilal və digər rəsmilər təmsil ediblər.
Məlumata görə, nümayəndə heyətləri arasında danışıqlar başa çatdıqdan sonra iki ölkənin daxili işlər nazirlikləri arasında əməkdaşlığa dair anlaşma memorandumlarının imzalanması gözlənilir.
Mustafa Çiftçinin səfər çərçivəsində Suriyanın fövqəladə hallar və fəlakətlərin idarə olunması naziri Raed əl-Salih ilə də görüşəcəyi, daha sonra isə Prezident Əhməd əş-Şəra tərəfindən qəbul ediləcəyi planlaşdırılır.
