BAKI,VOA Orxan Qədirzadə
Türkiyədə hakim Ədalət və İnkişaf Partiyası (AK Partiya) yeni Konstitusiyanın hazırlanması istiqamətində işlərin davam etdiyini və sənəd üzrə parlamentdə geniş siyasi razılıq əldə olunduqdan sonra layihənin ümumxalq referendumuna çıxarılmasının hədəfləndiyini açıqlayıb.
Bu barədə AK Partiyanın Siyasi və Hüquq İşləri üzrə sədr müavini Hayati Yazıcı Qərbi Qara dəniz Regional Toplantısının açılış mərasimində çıxışı zamanı bildirib.
Abant Gölü Milli Parkında yerləşən hotellərdən birində keçirilən iki günlük toplantıda AK Partiyanın deputatları, vilayət təşkilatlarının sədrləri və partiya üzvləri iştirak ediblər.
Hayati Yazıcı çıxışında Türkiyə Konstitusiyasına indiyədək 19 dəfə dəyişiklik edildiyini xatırladaraq, ən mühüm dəyişikliklərdən birinin 15 iyul dövlət çevrilişinə cəhdindən sonra Cümhur İttifaqının təşəbbüsü ilə prezident idarəetmə sisteminin tətbiqi olduğunu bildirib.
O qeyd edib ki, Türkiyə yeni Konstitusiyanı parlamentdə bütün tərəflərin razılığı əsasında hazırlamağı, daha sonra isə xalqın təsdiqinə təqdim etmək üçün referendum keçirməyi planlaşdırır.
"Türkiyə mütləq yeni Konstitusiyanı birlikdə hazırlayacaq. Məclisdə konsensus əldə etdikdən sonra sənədi referendum yolu ilə xalqın təsdiqinə təqdim edəcəyik. Ümid edirəm ki, bu məqsədimizə nail olacağıq və buna nail olmağımız vacibdir", – deyə Yazıcı vurğulayıb.
Hayati Yazıcı çıxışında "Terrorsuz Türkiyə" təşəbbüsü çərçivəsində qanunvericilik üzərində işlərin də davam etdiyini bildirib.
Onun sözlərinə görə, Türkiyənin müxtəlif problemləri olsa da, hazırda gündəmdə duran ən mühüm məsələlərdən biri terrorun tam aradan qaldırılmasıdır.
"Bizim ən böyük gücümüz birliyimiz, bütövlüyümüz və qardaşlığımızdır. Bunun dəyərini ölçmək mümkün deyil. Cümhur İttifaqı bu istiqamətdə lazımi açıqlamalar verməyə davam edir və yol xəritəmiz üzrə fəaliyyətimizi davam etdiririk", – deyə o bildirib.
Yazıcı qeyd edib ki, bu məqsədlə hüquqi çərçivə və qanunvericilik dəyişiklikləri hazırlanır və hazırda həmin layihələr üzərində iş aparılır.
O vurğulayıb ki, görüləcək tədbirlər heç bir halda şəhidlərin xatirəsinə hörmətsizlik və qazilərin narahatlığına səbəb olacaq yanaşma ilə həyata keçirilməyəcək.
"Türkiyənin maraqlarına, xalqımızın məqsəd və istəklərinə uyğun olan nə varsa, onu birlikdə həyata keçirərək ölkəmizi bu bəladan xilas edəcəyik", – deyə AK Partiya rəsmisi bildirib.
Hayati Yazıcı əlavə edib ki, AK Partiya son 25 ildə ölkənin bütün sahələrində islahatlar həyata keçirib və diqqətdən kənarda qalan heç bir istiqamət olmayıb.
"Siyasətimiz əhatəli və birləşdiricidir. Türkiyənin heç bir problemini qapalı qapılar arxasında saxlamamışıq. Bütün məsələləri prioritetlər əsasında qiymətləndirərək ölkəmizi addım-addım bu günə gətirmişik", – deyə o qeyd edib.
Toplantının qalan hissəsinin mətbuat üçün qapalı formatda davam etdirildiyi bildirilib.
