BAKI,VOA, Fərid Mikayılov
Türkiyənin hakim Ədalət və İnkişaf Partiyasının (AK Parti) sözçüsü Ömər Çelik İsrailin Qəzza zolağına hücumlarını sərt tənqid edərək, Baş nazir Benyamin Netanyahunun rəhbərlik etdiyi hökuməti sülh təşəbbüslərini məqsədli şəkildə pozmaqda ittiham edib.
VOA xəbər verir ki, Çelik bildirib ki, Netanyahu hökuməti Qəzzada hücumlarını davam etdirir və son əməliyyatlar zamanı 30-dan çox mülki şəxs həlak olub, səhiyyə obyektləri hədəfə alınıb.
Onun sözlərinə görə, bu hücumlar Qəzza Sülh Planının həyata keçirilməsi üçün yol xəritəsi üzrə razılığın əldə olunmasından dərhal sonra baş verib.
"Bu, Netanyahu şəbəkəsinin sülhü həyata keçirəcək hər bir addımı düşmən hesab etdiyini bir daha göstərir", – deyə Çelik vurğulayıb.
AK Parti sözçüsü bildirib ki, Netanyahunun əsas məqsədi Qəzzanı tamamilə məhv etməkdir.
"Bu, bəşəriyyətin bütün dəyərlərinə qarşı yönəlmiş addımdır. Netanyahu artıq təcavüzkar siyasəti ilə sülhü dəstəkləyən bütün ölkələrin təşəbbüslərini sabotaj edir", – deyə o əlavə edib.
