Anthropic Tramp administrasiyası ilə münasibətlərini yaxşılaşdırıb

ABŞ-nin ticarət naziri Hovard Latnik “Anthropic” şirkətinin Tramp administrasiyası ilə münasibətlərinin yaxşılaşdığını açıqlayıb. Nazir şirkətin yenidən administrasiyanın etimadını qazandığını bildirib. Tərəflər arasında daha əvvəl süni intellektin hərbi məqsədlərlə istifadəsi ilə bağlı ciddi fikir ayrılığı yaranmışdı. “Anthropic” öz süni intellekt sistemlərinin ölkədaxili müşahidə və insan müdaxiləsi olmadan fəaliyyət göstərən silahlarda istifadəsinə qarşı çıxmışdı. Bundan sonra şirkətin bəzi hərbi müqavilələrdə iştirakı məhdudlaşdırılmışdı. “Anthropic” qərara qarşı məhkəməyə müraciət etmişdi. ABŞ hakimi bir neçə gün əvvəl şirkətin xeyrinə qərar verib. Son açıqlamalar şirkətlə Tramp administrasiyası arasında münasibətlərin yumşaldığını göstərir.

2 Sentyabr 2026 20:58

BAKI,VOA,Yusif Şərifzadə

ABŞ-nin ticarət naziri Hovard Latnik süni intellekt sahəsində fəaliyyət göstərən “Anthropic” şirkətinin Donald Tramp administrasiyası ilə münasibətlərinin yaxşılaşdığını bildirib. Onun sözlərinə görə, tərəflər arasında əvvəl yaranmış ciddi fikir ayrılıqlarından sonra şirkət yenidən administrasiyanın etimadını qazanıb.

VOA xəbər verir ki, Hovard Latnik “Anthropic”in administrasiyanın tələblərini yerinə yetirdiyini və hazırda münasibətlərin əvvəlki dövrlə müqayisədə yaxşılaşdığını deyib. Nazir şirkətə yenidən etimad göstərildiyini vurğulayıb.

Açıqlama ABŞ məhkəməsinin “Anthropic” ilə ölkənin hərbi rəhbərliyi arasındakı mübahisədə şirkətin xeyrinə qərar verməsindən bir neçə gün sonra səsləndirilib. Federal hakim Pentaqonun şirkətə qarşı tətbiq etdiyi məhdudiyyətlə bağlı mövqeyini qəbul etməyib.

Tərəflər arasında əsas fikir ayrılığı süni intellektin hərbi məqsədlərlə istifadəsinin sərhədləri ilə bağlı yaranmışdı. ABŞ-nin müdafiə naziri Pit Heqset “Anthropic”in bəzi hərbi müqavilələrdə iştirakını məhdudlaşdırmışdı.

Buna səbəb şirkətin “Klod” süni intellekt sistemlərinin ölkə daxilində müşahidə fəaliyyəti və insan müdaxiləsi olmadan hədəfi müəyyənləşdirib zərbə endirə bilən silahlarda istifadəsinə razılıq verməməsi olmuşdu. “Anthropic” bundan sonra Kaliforniya məhkəməsinə müraciət etmişdi.

Son açıqlamalar Vaşinqtonla şirkət arasındakı münasibətlərdə yumşalmanın baş verdiyini göstərir. Bununla belə, süni intellektin hərbi məqsədlərlə istifadəsinə dair əvvəlki fikir ayrılıqlarının tam həll olunub-olunmadığı hələ aydın deyil.