Səudiyyə Ərəbistanı Futbol Federasiyasının Baş Assambleyası bazar günü keçirilən növbədənkənar iclasında Bədr ər-Rəzizəni 2026–2030-cu illəri əhatə edən 6-cı dövr üçün İdarə Heyətinin sədri vəzifəsinə yekdilliklə seçib. O, bu postda Yasir əl-Mişalı əvəzləyib. Seçki Komissiyasının sədri Əhməd əl-Quneyan seçki prosedurlarının tamamlanmasından sonra ər-Rəzizənin siyahısının təsdiqləndiyini və yeni İdarə Heyətinin 4 illik səlahiyyət müddətinə başladığını elan edib.
Seçildikdən sonra çıxış edən ər-Rəzizə sabiq prezident Yasir əl-Mişala təşəkkürünü bildirərək deyib: "Xüsusi nitq hazırlamamışdım, çünki əsas məqsədim bir şeyi demək idi: Təşəkkürlər, Yasir əl-Mişal! Sizinlə və həmkarlarınızla keçən 7 il qısa bir dövr deyildi".
Öz növbəsində Yasir əl-Mişal ötən yeddi ilin Səudiyyə idmanına xidmət edən komanda işi olduğunu vurğulayıb: "İdarə Heyətindəki həmkarlarımla birlikdə Səudiyyə idmanına xidmət etməkdən şərəf duyduq. Qazanılan hər bir uğur hamının birgə səyinin nəticəsidir". Əl-Mişal 7 illik fəaliyyəti bir neçə dəqiqəyə sığdırmağın çətin olduğunu qeyd edərək idman sahəsinə göstərilən böyük dəstəyə görə İki Müqəddəs Ocağın Xadimi Krala və Vəliəhd Şahzadəyə minnətdarlığını bildirib.
Əl-Mişal həmçinin Səudiyyə Federasiyasının dünya üzrə 200-dən çox futbol federasiyası ilə güclü əlaqələrə malik olduğunu, bu federasiyaların rəhbər və baş katiblərinin məlumat bazasının mütəmadi olaraq yeniləndiyini açıqlayıb.
Baş Assambleyanın iclasında Əsasnamənin 23-cü maddəsinin 2-ci bəndinə uyğun olaraq iclas protokolunu yoxlamaq üçün 3 nümayəndə təyin edilib: "Muhayil" klubunun nümayəndəsi Dr. İbrahim əl-Muhayili, "Mudar" klubunun nümayəndəsi Adil əs-Sətri və "Əl-Vətən" klubunun nümayəndəsi Xalid əl-Həzimi.
Bundan əlavə, Əsasnamənin 23-cü maddəsinin 5-ci bəndinə əsasən, səslərin sayılması prosesinə nəzarət üçün 3 müstəqil müşahidəçi təsdiqlənib: Səudiyyə Gimnastika Federasiyasının baş icraçı direktoru Əmr Hüseyn, Səudiyyə Hokkey Federasiyasının baş icraçı direktoru Əbdülilah əl-Meymun və Səudiyyə Kiberidman Federasiyasının baş icraçı direktoru Rəvan əl-Buteyri.
